Загварын шүтээн хэмээгддэг Karl Lagerfeld нь 21-р зууны хамгийн алдартай загвар зохион бүтээгчдийн нэг билээ. Сонгодог загварыг орчин үеийн хэв маягтай чадварлагаар уялдуулж загваруудаа бүтээдэг байсан түүний хувьд загвар зохион бүтээх нь амьсгалахтай адил байгалиасаа гардаг зүйл гэдэг байжээ.
Тэрээр загварыг хувцаснаас илүүтэйгээр хандлага хэмээн тодорхойлдог байв. 1980-аад онд CHANEL тансаг зэрэглэлийн брэндийг бараг л дампуурах шахаж байсан уналтын үед нь Карл дизайнераар ажиллаж эхлэн эргүүлж хөл дээр нь босгож байсан түүхтэй. Карл загвар зохион бүтээхээс гадна илюстрейшн зураач, зурагчин, стилист, кино зохиолч гэх мэт тал бүрийн авьяастай хүн байсан. CHANEL брэндийн бүхий л зураг авалт, сурталчилгаа, богино хэмжээний киног өөрөө зургийг нь авч найруулдаг байжээ.
Karl Lagerfeld бол загварын шүтээн төдийгүй бусдад жинхэнэ “inspiration” болсон нэгэн байсан юм. Түүний амьдрал загвартай салшгүй холбоотой байсан гэдэг нь Jean Patou, Charles Jourdan, Chloé, Krizia, Valentino зэрэг дэлхийд танигдсан загварын брэндүүдэд загвар зохион бүтээгчээр ажиллаж, Chanel, Fendi брэндүүдийн бүтээлч захирлаар ажиллаж байснаас нь харагдана.
1984 онд CHANEL брэндэд ажиллаж байх үедээ өөрийн нэрийн KARL LAGERFELD брэндээ үүсгэн байгуулж Парисын сонгодог хэв маягийг орчин үеийн дэгжин, рок-шик загвартай хослуулсан хувцас, аксессуаруудыг гаргах болжээ. Уг брэндэд Karl-ын хувь хүний шинж чанар, нууцлаг характер, хурц ухаан, алсын хараа, өвөрмөц харах өнцөг нэвт шингэсэн байдаг.
Өдгөө KARL LAGERFELD нь тансаг зэрэглэлийн эрэгтэй, эмэгтэй, хүүхдийн хувцас, цүнх, арьсан эдлэл, цаг, нүдний шил, үнэртэй ус, лаа болон бусад аксессуаруудыг үйлдвэрлэж боломжийн үнээр худалдаалдаг, залуучуудын хайртай брэндүүдийн нэг болсон юм. Брэндийн төв оффис нь Парис хотод байрладаг төдийгүй загвар, худалдааны том хотууд болох Нью Йорк, Москва, Лондон, Дубай, Шанхайд гэх мэт дэлхий даяар нийт 200 гаруй салбартай болон хөгжөөд байна.
