Цанын хувцсаараа дэлхийд танигдсан Италийн тансаг зэрэглэлийн загварын брэнд болох Moncler-ийг танилцуулж байна. “Moncler” нь Monestier-de-Clermont хэмээх Альпын нуруун дахь Францын жижиг тосгоны нэрийн товчлол бөгөөд Рене Рамильон болон Андре Винсент нар 1952 онд анх үүсгэн байгуулж байжээ.
Мишок, юүдэнтэй нөмрөг, майхан зэрэг аяллын бүтээгдэхүүнүүдээрээ анх хүмүүст танигдаж эхэлсэн бөгөөд 1954 онд анхны гадуур хувцсаа уулан дахь нэгэн үйлдвэрийн ажилчдад зориулан гаргаж байсан түүхтэй. Дараагаар нь Францын уулчин Лионель Террайтай хамтарч ‘Moncler pour Lionel Terray’ хэмээх онцгой цуглуулгыг гаргасан. Уг цуглуулгад эрс тэс уур амьсгал, хахир хүйтэн цаг агаарт зохицсон галууны өдөн куртка, цанын хувцас, бээлий, мишок зэрэг орсон юм.
Түүнчлэн Италийн уулчид болох Акилле Компаньони, Лино Лачеделли нар дэлхийн 2 дох хамгийн өндөр оргил болох K2 (8.611 метр) руу авирахдаа Moncler-ын курткаг өмсөж байсан нь түүхэнд бичигджээ. Үүний дараагаар 1955 онд Макалу (8,470 метр) оргил руу авирсан Францын уулчид, 1964 онд Лионель Террайн зохион байгуулсан Аляск(6.190 метр) дахь аяллын багийнхан тус тус Moncler-ийн хувцсыг өмссөн байна. Цаашилбал, 1968 онд Гренобльд болсон Өвлийн Олимпд Францын цанын багийнхан мөн Moncler брэндийн хувцсыг өмсөж байжээ. Ийнхүү тухайн үеийн уулчид, цаначдын хувьд нэг номерын сонголт нь Moncler болоод байлаа.
1980-аад оны шилдэг загвар зохион бүтээгчдийн нэг болох Шанталь Томас Moncler-т ажиллаж эхэлснээр үндсэн загваруудыг ахин шинэчилж цахилгааныг нь товчоор сольж, үслэг оруулга оруулж, 2 талаар нь өмсдөг материалаар хийх гэх мэт илүү залуу үеийнхэн рүү чиглэсэн хотын хэв маягтай загварууд гаргах болжээ.
Харин 2003 онд Италийн бизнесмен, тэрбумтан Ремо Руффини Moncler брэндийг худалдаж авснаар брэндээ олон улс руу тэлэх стратегийг хэрэгжүүлж эхэлсэн байна. Тэрээр одоо Moncler группийн ерөнхийлөгч, гүйцэтгэх захирал бөгөөд дэлхийд алдартай Moncler-ийн нэрийн курткаг бүтээх нь түүний санаа байсан юм. Үүнээс хойш хувцасны өмсгөл, өнгө үзэмж, материал дээр онцгой анхааран дээд зэргийн чанартай, олон функцтэй загвар гаргахыг эрхэм зорилгоо болгожээ. Түүнчлэн 2015 оноос эхлэн байгальд ээлтэй байх тал дээр нилээдгүй анхаарч ажиллаж байгаа.
Moncler-ийн хувьд брэндийн өв уламжлал, дээд зэргийн чанар, бүтээлч байдал, дэвшилтэт технологийг хослуулдаг нь тэдний амжилтын үндэс гэж хэлж болно. 2020 оны байдлаар уг брэнд нь дэлхий даяар 200 гаруй нэрийн дэлгүүртэй, 4000 гаруй ажилчидтай, эрэгтэй, эмэгтэй хувцас, Genius болон Moncler Grenoble (спортлог загварууд) тусгай коллекциудтай, гутал, цүнх бусад арьсан эдлэлүүд, нүдний шил зэрэг олон төрлийн бүтээгдэхүүнүүд үйлдвэрлэн гаргадаг, 1 тэрбум еврогийн эргэлттэй томоохон бизнес болон хөгжсөн байна