1. Япончуудын уламжлалт Зул сарын зоог бол KFC.
Ихэнх улс орнуудын хувьд зул сарын баярын зоог нь цацагт хяруул байдаг бол Япончуудын хувьд KFC байдаг. Баярын уур амьсгал шингээсэн баглаа боодол, KFC-гийн гаднах Колонел Сандерсын хөшөөнд өмсгөсөн Сантагийн хувцас гэх мэт ухаалаг маркетингийн нөлөөллөөр KFC шарсан тахиа Япончуудын дуртай баярын зоог нь болжээ.
2. Швед: Ямаа шатаадаг уламжлал
Хэрвээ 12 сард Шведийн Гавлед очвол “Julbocken” хэмээх Зул сарын билэгдэл болсон асар том сүрлэн ямааг харах боломжтой юм. 1966 оноос хойш ямааг жил бүр галдан шатаасан төдийгүй хамгийн сонирхолтой нь хэн шатаасан нь хэзээ ч баригддаггүй гэнэ. Ямар ч байсан жил болгон ямааг шатаадаг ба харин хэр удаан тэсэж үлдсэн нь үндэсний мэдээгээр гардаг болсон байна.
3. Каракас : Дугуйт тэшүүрээр сүм рүүгээ
Зул сарын баярын өмнөх 7 хоног Венесуэлчүүд өдөр бүр сүм рүү явж залбирал үйлддэг гэнэ. Тэгвэл Венесуэлийн нийслэл Каракаст сүм рүүгээ дугуйт тэшүүрээр явдаг уламжлалтай. Тэднийг аюулгүй зорчуулах үүднээс хотын ихэнх замыг өглөөний 8 цаг хүртэл хаадаг юм байна.
4. Австри : Муу хүүхдүүдийн эрлэг Крампус
Австрийн домогт Зул сарын баярын өмнө муу хүүхдүүдийг шийтгэдэг Крампус нэртэй чөтгөр гардаг. Хүүхдүүдийг үнэмшүүлэхийн тулд Австри эрчүүд чөтгөрийн хувцас өмсөж, муу хүүхдүүдийг там руу авч явахаар гинж, сагстай гудамжаар алхдаг уламжлалтай.
5: Каталони: Хэрвээ сайн баахгүй бол саваагаар зодно шүү!
Каталоничууд гуалин модон дээр нүүр зурж, малгай өмсгөөд, түүнийгээ хоёр 7 хоногийн турш самар жимс амттангаар булдаг. Харин Зул сарын өмнөх орой гэр бүлийн бүх гишүүд гуалин дээр тавьсан амттангуудаа унаж дуустал саваа модоор зодож, “хэрвээ сайн баахгүй бол саваагаар зодно шүү” гэсэн утга бүхий үндэсний дуугаа дуулдаг гэнэ. Мөн бааж буй хүний хэлбэртэй шаазан тоглоомоор гэрээ чимэглэдэг өвөрмөц заншилтай.
6. Гренланд : Хэзээ ч мартагдахгүй Зул сарын зоог
Зул сарын баяраар Гренландчууд Маттак буюу түүхий халимын өөхтэй арьс болон Кивиак буюу Аук шувууг далайн хавны арьсанд ороож түүнийгээ хэдэн сарын турш дарсны эцэст иддэг байна. Үнэхээр өвөрмөц хоолтой юм.
7. Украин: Аалзны тороор модоо чимэглэх
Украинчууд Зул сарын модон дээрээ гоёмсог гэрэл, тоглоомоос гадна хиймэл аалзны тор тавьж чимэглэдэг. Эртний домогт “гацуур модоо ч чимэглэх боломжгүй ядуу бүсгүйг Зул сарын өглөө сэрэхэд нь аалз гоёмсог, гялалзсан тороороо чимэглэсэн байв” хэмээн гардаг байна. Уг домгоос улбаалан энэ уламжлал төрсөн бөгөөд энэ нь азыг билэгддэг гэнэ.
8. Итали : Сантагийн туслах бол шулам
Санта байдгийг хэрхэн батлахаа мэдэхгүй байсан Ватиканчууд Ла Бефана хэмээх шулмыг сэдэж олсон байна. Үлгэрт гардаг Ла Бефана шулам нь Католик шашны баярын өмнөх өдөр буюу 1.5-нд хүүхдүүдийн оймсонд сайн муу байснаас нь хамаараад нэг бол чихэр эсвэл нүүрс хийн үлдээдэг байна.
9. Чех: Ганц бие эмэгтэйчүүдийн уламжлал
Зул сарын өмнөх орой ганц бие Чех эмэгтэйчүүд хаалга руу гаа нуруугаа харуулан зогсоод гутлаа мөрөн дээгүүрээ давуулан шиддэг байна. Хэрвээ гутал хаалга руу харж унасан бол тэр жилдээ гэрлэнэ, харин өсгий нь хаалга руу чиглэсэн байвал тухайн жилдээ гэрлэж чадахгүй хэмээн итгэдэг гэнэ.
10. Норвеги: Шүүрээ нуух
Норвегичууд Зул сарын өмнөх шөнө чөтгөр, шулам, сүнснүүд ирдэг гэж итгэдэг учир унтахаасаа өмнө бүх шүүрнүүдээ нуудаг байна.
