Алдартай загвар зохион бүтээгч, Thierry Mugler брэндийн үүсгэн байгуулагч Манфред Тьерри Мюглер 2022 оны 1 сарын 23-ны өдөр 73 насандаа харамсалтайгаар таалал төгслөө. Тэрээр гайхалтай өвөрмөц хэлбэр дүрс бүхий сюрреалист, таамаглашгүй загваруудаараа загварын ертөнцөд нэрээ мөнхөлсөн нэгэн билээ. Франц гаралтай загвар зохион бүтээгч маань 1980, 1990-ээд оны Европын загварын тайзыг жинхэнэ эзэгнэж байсан гэхэд хилсдэхгүй. Түүний шоу болгон онцгой үзүүлбэрүүд, алдартнуудыг оролцуулсан урлагийн тоглолт мэт болдог байв.
Мюглер 1948 онд Францийн Страсбургт төрж өссөн бөгөөд тэндээ урлагийн сургуульд суралцаж, дуурийн театрт бүжиглэдэг байжээ. 1966 онд Парис руу нүүснээр олон загвар зохион бүтээгчидтэй хамтран, дизайнер болон фото зурагчнаар ажиллаж эхэлсэн түүхтэй. Тэрээр 1973 онд өөрийн урласан бүтээлүүдээ анх удаа олонд танилцуулсан ба дараа жилээс нь Thierry Mugler брэндээ үүсгэн байгуулж байлаа.
Хэний ч санаанд багтамгүй 3 зүйлийг хослуулдаг байсан нь архитектурын элементүүд, тансаг загвар, “S&M” хэв маяг 3 байв. “Femme fatale” эмэгтэйг дүрслэх дуртай тэрээр хүчирхэг өргөн мөр, нарийн бэлхүүсийг тодотгосон доошоо харсан гурвалжин болон элсэн цаг хэлбэрт дуртай байсан нь загваруудаас нь тод харагдана. Мөн загварууддаа латекс, арьсан материалуудыг түлхүү ашигладаг байсан.
Сонирхуулахад Мюглер нь хувьсах дуртай нэгэн байсан бөгөөд 2002 онд загварын брэндээ орхисны дараа биеэ бялдраа хөгжүүлж, нүүрэндээ мэс засал хийлгэн Манфред нэрээ ашиглан цоо шинэ дүр төрхтэй олны өмнө ахин гарч ирсэн юм.
Гэсэн ч өдийг хүртэл тэрээр алдартай одуудыг хувцаслаж бидний нүдийг хужирласаар байсан. Тухайлбал, дуучин Бейонсегийн дэлхийг тойрсон тур тоглолтын хувцаснууд, Карди Б-гийн Греммигийн шагнал гардуулах ёслолын гүнжийн даашинз, Ким Кардашианы Мет Гала дээр өмссөн усан дуслуудтай нойтон юм шиг харагдах өвөрмөц даашинз зэрэг нь түүний бүтээлүүд байсан юм.
