Монголчууд бидний өвөг дээдсийн үеэс уламжлан ирсэн үндэсний баяр “Цагаан сар” тун удахгүй болох гэж байна. Монголчуудын маань хувьд Цагаан сар нь нэг нэгнийхээрээ зочилж ах дүү, төрөл саднаа мэдэлцэх, ахмадуудынхаа амар мэндийг мэдэх, тэднийгээ хүндэтгэх утга учиртай хамгийн чухал үндэсний баяруудын нэг билээ.
Түүнчлэн Монгол улсаас гадна Солонгос, Япон, Хятад, Вьетнам гээд Азийн хэд хэдэн улсууд “Lunar New Year” буюу Цагаан сарын баярыг тэмдэглэдэг уламжлалтай. Сүүлийн үед загварынхан уг баярт ихээхэн ач холбогдол өгөх болсон нь загварын зах зээлд Ази тивийн эзлэх байр суурь томорч байгаатай холбоотой юм. 2022 оны хувьд Gucci, Prada, Valentino, Jil Sander, Balenciaga зэрэг дэлхийн алдартай брэндүүд Цагаан сарын онцгой капсуль коллекциудыг гаргасан бөгөөд бар жил гарч байгаатай холбогдуулан барын эрээн хээ, барын дүрстэй принт бүхий гоёмсог дэгжин загваруудыг урлажээ.
Gucci
Италийн алдарт Gucci брэнд Бар жил гарч байгаатай холбогдуулан “Gucci Tiger” нэртэй шинэ коллекцио гаргалаа. Уг коллекцидоо үзэсгэлэнт зэрлэг байгаль дахь хүчирхэг барыг дүрсэлсэн загваруудыг багтаажээ. 1960-аад онд гаргаж байсан Gucci-гийн уламжлалт “Flora” хээг түрийвч, цаг , цүнх, гутал зэрэгтээ онцлон оруулж, байгалийг дүрслэхдээ зөөлөн пастель өнгийг түлхүү ашигласан байна. Түүнчлэн орчин үеийн загварыг үндсэн логоны принттэйгээ хоршуулсан нь загварын ордны өнгөрснийг одоо үетэй нь төгс хослуулсан мэт харагдана.
Prada
Valentino брэндий хувьд Бар жилд зориулан “Valentino Tiger 1967” нэртэй шинэ цуглуулгаа гаргажээ. 1967 онд Германы алдарт модель Veruschka-гийн Vogue сэтгүүл дээр мөнхөлсөн Valentino брэндийн барын хээтэй тансаг загваруудаас сэдэл авсан учир ийнхүү нэрлэжээ. Харин орчин үеийн хувилбартаа илүү өдөр тутмын чөлөөт загварууд болох тод өнгийн барын хээтэй малгайтай цамц, шорт, цүнх, гутал, коршокон малгай зэргийг багтаасан байна.
Valentino
Прада брэндийн хувьд барнаас сэдэвлэсэн коллекци гаргахын оронд нэн ховордож буй амьтдын нэг болох барыг хамгаалах төслүүд болон нийгэмд үүний талаар мэдээлэл өгөх тал дээр илүү анхаарч ажиллаж байна. Уг компанит ажлын зураг авалтад Хятадын алдарт дуучин Li Yifeng, жүжигчин Chun Xia нар оролцсон юм. Үүний хажуугаар дэлхий даяарх урлагийн сургуулиудтай хамтран хүмүүсийн хувьд бар юуг илэрхийлдгийг өөрийн урлагийн мэдрэмж, бүтээлч байдлаараа дүрслэх уралдаан хүртэл зарласан байна. Прада групп нь “China Green Foundation” сангийн “Бар болон ирвэстэй хамт алхъя” программын хандивын ажилд мөн оролцож байгаа юм.
Balenciaga
Balenciaga брэнд нь Бар жилийг угтан барнаас сэдэвчилсэн загвартай 57 төрлийн хувцас, аксессуаруудыг гаргажээ. Уг коллекцид барын хээтэй фудболк, хослол, зузаан хүрэм, оймсноос эхлээд маш олон төрлийн улбар шар, хар болон цагаан өнгөөр дагнасан, өдөр тутмын загварууд багтсан байна. Мөн зарим саравчтай малгай, малгайтай цамц, картын гэр, түлхүүрийн оосрууд нь барын хээгүй ч урдаа барын график дүрсийг ашигласнаараа онцлогтой байв. Загварын хувьд Balenciaga-гийн нэрийн хуудас болсон чөлөөт стилийн, загварлаг, өдөр тутамд өмсөхөд тохиромжтой орчин үеийн залууст зориулсан коллекци байлаа.
Jil Sander
Минимал загварыг эрхэмлэгч Jil Sander брэнд нь Бар жилд зориулан 6 хувцаснаас бүрдсэн тусгай цуглуулгыг гаргасан байна. Уг коллекци нь орчин үеийн минимал загвартай бөгөөд гоёмсог барын иллюстрешн зураг оруулснаар илүү онцлог болжээ. Бар бол зоригтойгоос гадна хүч чадлын билэгдэл болсон юунаас ч хамааралгүй бие дааж амьдардаг хүчирхэг амьтан юм. Тиймээс ч усан будгаар зурсан барны дүрсээрээ эр зориг, хүч чадал, өөртөө итгэлтэй байдлыг илэрхийлэхийг зорьжээ.