Олон жилийн уламжлалтай, алдартай брэндүүдийн хэзээ ч моданаас хоцрогддоггүй, сонгодог загварын цүнхнүүдийг эс тооцвол цүнхний загвар тренд хувцас, гутлаас илүү хурдан өөрчлөгдөж байдаг. Харин 2022 онд ямар төрлийн цүнхнүүд загварын чиг хандлагыг тодорхойлж байна вэ?
Сүүлийн 2 жил хэрэглэгчдийн тансаг зэрэглэлийн брэндээс худалдан авалт хийх нь эрс нэмэгдсэн бөгөөд цүнхний өнгө, хэлбэр гэхээс илүү байгальд ээлтэй, хиймэл арьсаар хийгдсэн эсэхэд анхаарал хандуулах болсныг мэргэжилтнүүд хэлж байна.
Нэхмэл цүнх
Энэ зун ямар загварын цүнх авахаа хараахан шийдээгүй байна уу? Тэгвэл энэ зуны хамгийн хүсэмжит цүнх болох нэхмэл цүнхийг сонирхоод үзээрэй. JW Anderson, Chloé брэндүүд өөр өөрсдийн загварлаг, нэхмэл цүнхнүүдийг гаргасан бол Loewe брэнд далайн хаягдал хуванцрыг ахин боловсруулж цүнхнүүдээ урлажээ.
Хурц өнгөний сонголт
2022 хамгийн сэтгэл хөдөлгөм тренд бол тод өнгийн хувцас, цүнх юм. Өнгөрсөн оны хувьд ногоон өнгө ид тренд болсон ба ногоон өнгөний цүнхний борлуулалт 151%-аар өссөнийг Net-a-Porter вебсайтын эрхлэгч дурдсан юм. Харин энэ зун ягаан, цэнхэр, улбар шар зэрэг бусад тод өнгөнүүдийг хаа сайгүй харах нь.
Байгальд ээлтэй байх
Сүүлийн жилүүдэд хүмүүс байгальд ээлтэй, ухаалаг хэрэглэгч байхыг эрмэлзэж эхэлсэн учир жинхэнэ арьсан цүнхнээс илүү хиймэл арьс, эсвэл бусад байгальд ээлтэй материалуудыг сонгох болжээ. Тухайлбал, Stella McCartney брэнд мөөг ашиглан цүнх хийсэн бол Santos брэнд кактусыг боловсруулж байгальд ээлтэй цүнх урласан байна.
Винтеж загварууд
Орчин үед Gucci, YSL, Dior зэрэг олон жилийн түүх, өв уламжлалтай томоохон брэндүүд архиваасаа хуучны гайхалтай загваруудаа ахин шинэчилж гаргах болсон. Хуучны ретро загварууд тренд болж буй энэ үед уг загварууд эрэлт өндөртэй байх нь тодорхой юм.
Хавирган сар
1990-ээд онд моданд орж байсан хагас дугуй хавирган сарны хэлбэртэй цүнх эргэн ирлээ. Уг цүнх нь энгийн хувцаслалтыг ч цаанаа л нэг донжтой, загварлаг харагдуулдаг шүү.
XL хэмжээ
Хэрэгцээт бүх зүйлсээ цүнхэндээ багтааж авч явах дуртай бүсгүйчүүдэд зориулсан супер том хэмжээтэй цүнхнүүд энэ жилийн тренд болоод байна. The Row, Proenza Schouler White Label, Loewe зэрэг брэндүүдийн том хэмжээтэй гоёмсог цүнхнүүд энэ хавар зуны загварын тайзыг чимсэн юм.
Гар цүнх
Жинхэнэ утгаараа гартаа барьж явдаг гар цүнхнүүд энэ улирлын бас нэгэн онцлох гоёл болоод байна. Гоёмсог загвартай бариулыг нь бугуйдаа углан аксессуар маягаар ашиглаж ч болох юм.
