Эмэгтэй хүн болгон ахин давтагдашгүй онцгой чанар, сонирхол, хүсэл эрмэлзэлтэй. Гэсэн хэдий ч тэднийг нэгтгэдэг зүйл бол төгс төгөлдөр рүү тэмүүлдэг байдал нь. Тэгвэл эмэгтэйчүүд яг ямар интерьер хүсдэг юм бол?
Бүсгүйчүүдийн хувьд дотоод заслын хамгийн чухал зүйлс бол гоо үзэмж, энгийн бөгөөд тохь тухтай байдал юм. Тэгвэл тэдний “төгс” гэсэн тодорхойлолтод нийцэх мэргэжилтнүүдийн санал болгож буй интерьерийн санаануудаас хуваалцъя. Эдгээрээс та өөрийн хүсэл сонирхолд нийцүүлэн гэрээ тохижуулаарай.
Том цонх
Эрчүүд гэрээ үүр мэт боддог учир аль болох харанхуй байлгах дуртай бол эмэгтэйчүүдийн хувьд гэр нь гэрэл гэгээтэй байх маш чухал. Гэрэл сайтай өрөөнд хувцсаа солих, зураг зурах, бүтээлч ажил хийх, ном унших, хоол хийх зэрэг нь эмэгтэйчүүдэд тав тухтай санагддаг байна. Санал нийлж байна уу?
Гоо сайхны ширээ
Үнэртэй ус, үнэт эдлэл, чамин савлагаатай тос тань зориулалтын ширээн дээр байвал илүү гоё харагддаг биз дээ. Бүсгүйчүүд өргөн тольтой, гэрэлтүүлэг сайтай гоо сайхны ширээний урд арьс арчилгаагаа хийж нүүрээ будах үед хамгийн их сэтгэл ханамжийг авдаг гэнэ. Хэрвээ гэрлийн чийдэнтэй толь их зай эзлэх гээд байвал гоо сайхны ширээгээ цонхны өмнө тавьж болох юм.
Бяцхан декорууд
Ихэнх эмэгтэйчүүд шаазан баримал, гоёмсог савтай анхилуун үнэртэй лаа, аяллаас үлдсэн дурсгалын зүйлсээ хадгалах дуртай байдаг. Энгийн жижиг зүйлсээс ч сэтгэл ханамжийг авч байдаг тэдний хувьд өөрт таалагдсан бүхий л зүйлсээ гэртээ байлгах нь чухал. Тиймдээ ч бяцхан декортой интерьерын зургууд Инстаграм дээр хамгийн их хандалтыг авдаг биз ээ.
Ягаан өнгө
Ягаан өнгө шиг эмэгтэй хүнтэй хүчтэй холбогддог зүйлийг нэрлэхэд хэцүү. Ялангуяа цайвар ягаан өнгө нь шар, саарал, цагаан гээд олон өнгөтэй амархан хосолж төгс дотоод заслыг бүтээдэг. Ялдам, элегант байдлыг илтгэх энэ өнгө эмэгтэйчүүдэд үргэлжид хайрлагдсаар байх болно.
Хувцасны шүүгээ
Хайртай өсгийтүүдээ жирийтэл өрж, хувцаснуудаа өнгө уусган цэмцийтэл өлгөчихсөн, эмх цэгцтэй хувцасны өрөөтэй болохыг хүсдэггүй эмэгтэй байхгүй л болов уу. Энэ мөрөөдлөө биелүүлэх нь бодож байгаагаас ч хялбар байж болох юм. Өрөөнийхөө нэг буланг сонгоод жижиг ч хамаагүй хувцасны өрөө гарган яг одоо тохижуулж эхлээрэй.
Хагас гэрэлтдэг хөшиг
Хөшиг бол өрөө тасалгааны интерьерийн голлох хэсгүүдийн нэг. Эмэгтэйчүүдийн хамгийн дуртай загвар бол хагас гэрэлтдэг хөшиг юм. Скандинав хэв маяг бүхий ийм төрлийн хөшиг нь цэлмэг өдөр таныг нарны хурц гэрлээс хамгаалж, үүлэрхэг өдөр өрөөг харанхуй болгохгүй байх давуу талтай.
Цэцэг
Цэцгийн баглаа нь хамгийн энгийн, уйтгартай интерьерийг ч амилуулж чаддаг. Вааранд хийсэн цэцгийн баглаа эсвэл тасалгааны жижиг цэцэг, өрөөний тавилгуудтай хослох тод өнгийн цэцэг эсвэл таны гэрт гэрэл гэгээ нэмэх цагаан өнгийн цэцэг гээд олон төрлийн цэцгүүдээс та өөрийн мэдрэмж, сонирхолд тааруулан сонгож гэртээ байрлуулаарай.
Цэлгэр угаалгын өрөө
Жагсаалтын хамгийн сүүлд цэлгэр, гэгээтэй угаалгын өрөөг онцолж байна. Эмэгтэйчүүдийн хувьд үдшийг зөвхөн өөртөө зориулж, түр ч болов амсхийн амрах боломжтой газар нь том усны онгоц, гоо сайхны бүтээгдэхүүний булан, алчуурын тавиур зэрэг хэрэгцээт бүх зүйлсийг багтаасан угаалгын өрөө юм.
