1. Хөгжмийн наадам: Coachella
Хаана: Палм-Спрингс, Америк улс
Хөгжимд дурлагсдын жил бүр тэсэн ядан хүлээдэг “Coachella” хөгжмийн наадам 2 жил алгассаны дараа энэ жил уламжлалт ёсоор Калифорни мужийн Палм-Спрингсд болж байна. 1999 оноос хойш зохиогдож байгаа уг наадам нь хөгжим болон загварын тайзны хослол болдгоороо онцлогтой. Энд загварлаг хувцасласан олон алдартнуудыг харах боломжтой. Энэ жилийн хувьд Harry Styles, Billie Eilish, Megan Thee Stallion зэрэг олон алдартай дуучид оролцож байгаа.
Хэзээ: 4 сарын 2 эсвэл 3 дахь 7 хоногийн амралтын өдрүүдэд болдог
2. Хөгжмийн наадам: Tomorrowland
Хаана: Бум, Бельги улс
“Tomorrowland” нь дэлхийн хамгийн том хөгжмийн фестивалиудын нэг учир тасалбар нь маш хурдан зарагдаж дуусдаг. Хэрвээ электроник хөгжимд дуртай бол дэлхийн алдартай DJ нарын цугладаг уг наадамд заавал очиж үзээрэй. David Guetta, Tiesto, Armin van Buuren, Swedish House Mafia нарыг эндээс л харж, хөгжмийг нь амьдаар мэдрэх боломжтой.
Хэзээ: 7 сарын сүүлийн 7 хоногт болдог
3. Хөгжмийн наадам: Splendour in the Grass
Хаана: Байрон Бей, Австрали улс
Австралийн Байрон Бейд жил бүр зохиогддог уг хөгжмийн фестивальд олон улсын жуулчид ирж гайхалтай хөгжим сонсонгоо Австралийн соёлтой танилцдаг байна. 3 өдөр үргэлжилдэг уг фестивальд Австрали болон дэлхийн алдартай хамтлагууд ирж тоглодог. Kendrick Lamar, The Strokes, Kanye West, Outkast зэрэг одууд хүртэл ирж оролцож байсан.
Хэзээ: 7 сарын сүүлээр болдог
4. Хөгжмийн наадам: Sónar
Хаана: Барселон, Испани улс
“Sónar” бол Европийн хамгийн том EDM хөгжмийн фестивалиудын нэг юм. Уг наадам нь дижитал артаар мэргэшсэн бөгөөд жил бүр 120,000 орчим хүн наадмыг зорьж ирдэг байна. 3 хоног үргэлжилдэг уг фестивальд Skrillex, Major Lazer, M.I.A нар ирж оролцож байсан.
Хэзээ: 7 сарын дундуур болж өнгөрдөг
4. Хөгжмийн наадам: Burning Man
Хаана: Невада цөл, Америк улс
1986 оноос эхлэн зохиогдож байгаа олон жилийн түүхтэй зуны фестивалиудын нэг бол яах аргагүй “Burning Man” юм. Мөн дэлхийн хамгийн галзуу, чөлөөтэй фестиваль гэдгээрээ алдартай. Невадагийн халуун, хуурай элсэн цөлд болж өнгөрдөг бөгөөд нүд хамгаалах нисгэгчийн шил, нүүр халхлах бандана зэрэг нь уг фестивалийн форм гэж хэлж болно. Электроник хөгжим дээр төвлөрдөг ч “Burning Man” ямар нэгэн хөгжмийн төрлөөр хязгаарлагддаггүй. Урлаг, бүтээлч сэтгэлгээ, өөрийгөө чөлөөтэйгөөр илэрхийлэх, галзуу санаануудыг нэгтгэсэн уг фестиваль цоо шинэ ертөнцөд ирсэн мэт сэтгэгдэл төрүүлнэ.
Хэзээ: 8 сарын сүүлийн 7 хоногт эхэлж 7 хоног үргэлжилдэг
4. Хөгжмийн наадам: Nos Alive
Хаана: Лиссабон, Португал улс
2007 оноос эхлэн зохиогдож байгаа Европийн хамгийн сүүлийн үеийн фестивалиудын нэг юм. Хамгийн анхны фестиваль дээрээ л Pearl Jam, The Smashing Pumpkins, the Beastie Boys хамтлагуудыг авчирж чадсан бөгөөд өдгөө Bob Dylan, Metallica, Coldplay зэрэг дэлхийн алдартай хамтлаг дуучдын оролцдог томоохон фестиваль болжээ.
Хэзээ: 3 өдөр үргэлжилдэг ба 7 сарын 2 дахь 7 хоногт болдог
4. Хөгжмийн наадам: Glastonbury
Хаана: Сомерсет, Англи улс
Англи улсад зохиогддог хамгийн том фестивалиудын нэг бөгөөд бүх төрлийн орчин үеийн хөгжим, комеди, арт зэргийг эндээс үзэж сонсох боломжтой. “Glastonbury” нь Kate Moss, Cara Delevingne, Poppy Delevingne, Sienna Miller болон бусад Английн алдартнуудын очих дуртай фестиваль юм. Мөн Kylie Minogue, The Cure, Miley Cyrus, Billie Eilish зэрэг дэлхийн алдартай хамтлаг дуучид уг фестивальд тогтмол оролцдог.
Хэзээ: 3 хоног үргэлжилдэг ба 6 сарын сүүлийн 7 хоногт амралтын өдрүүдээр болж өнгөрдөг
4. Хөгжмийн наадам: Your Paradise
Хаана: Фижи арал улс
Жижиг хирнээ тухайн газрынхаа соёлыг харуулсан маш онцгой фестиваль юм. Дэлхийн төвшний электроник хөгжмийн тоглолтуудаас гадна усанд шумбалт, чөлөөт уналт, усан дээгүүр гулгах зэрэг сонирхолтой спорт аяллуудаас сонгож, туршиж үзэх боломжтой. Самбука шот ууж алдартнуудтай хөгжилдөх боломжийг олгодог “Your Paradise” фестивальд өмнө нь Skrillex, Peking Duk, Snakehips нар ирж оролцож байсан.
Хэзээ: 12 сарын эхний 7 хоногт болж өнгөрдөг. 7 хоног үргэлжилдэг
4. Хөгжмийн наадам: Fuji Rock Festival
Хаана: Юзава, Япон улс
“Naeba” цанын баазад зохиогддог “Fuji Rock Festival” нь Японы хамгийн том хөгжмийн фестивалиудын нэг юм. Анхны фестиваль нь 1997 онд Фүжи уулын ёроолд зохиогдож байсан түүхтэй. Тэд жилээс жилд дэлхийн хамгийн алдартай рок, электроник хамтлаг дуучдыг авчирдаг ба Red Hot Chili Peppers, Kendrick Lamar, Muse, Nine Inch Nails , Disclosure хамтлагууд ирж оролцож байжээ.
Хэзээ: 7 сарын хамгийн сүүлийн амралтын өдрүүдэд болдог
