Загварын ертөнцийн хамгийн том арга хэмжээнүүдийн нэг болох “Мет Гала” нь Нью Йорк хотод байрлах Метрополитан урлагийн музейн хувцасны институтэд зориулсан хандивын арга хэмжээ юм. Жил бүр хувцас загварын үзэсгэлэнгийн нээлтээ ийнхүү Мет Гала арга хэмжээгээр эхэлдэг уламжлалтай.
Анх яаж эхэлсэн бэ?
Анх 1948 онд алдартай загварын нийтлэлч Элеанор Ламберт тус арга хэмжээг үүсгэн байгуулсан ба 1995 оноос хойш одоог хүртэл Vogue сэтгүүлийн эрхлэгч Анна Винтур хариуцан зохион байгуулж байгаа юм. Өдгөө Мет Гала нь Нью Йорк хотын хамгийн том хандивын үйл ажиллагаанд тооцогддог ба “Forbes” сэтгүүлийн мэдээлснээр нийт 175 сая гаруй долларын хандив цуглуулж чаджээ.
Мет Гала дээр яг юу болдог вэ?
Товчхон хэлэхэд: Нууц. Тийм ч учраас ирсэн зочид утас, сошиал медиагаа ашиглах боломжгүй байдаг. Ерөнхийдөө арга хэмжээнд ирсэн зочид шинэхэн нээгдсэн үзэсгэлэнг үзэж сонирхон дараа нь тэдэнд тусгайлан бэлдсэн оройн зоогийг барьж дэлхийн алдартай дуучид, уран бүтээлчдийн үзүүлбэрийг үздэг байна.
Хаана зохиогддог вэ?
Нью Йорк хотын Метрополитан урлагийн музейд жил бүрийн 5 сарын эхний 1 дэх өдөр зохион байгуулагддаг. Гэвч цар тахлаас шалтгаалж 2020 онд хийгдээгүй бөгөөд 2021 онд хугацаанаасаа хойшлогдож 9 сард болж өнгөрсөн билээ. Харин энэ жилээс эргэн хэвэндээ орж товлогдсон хугацаандаа амжилттай болж өнгөрсөн.
Хэн уригддаг вэ?
Тус арга хэмжээнд ойролцоогоор 600 зочид уригдаж ирдэг. Дэлхийн алдартай А листийн одууд, шинэ залуу уран бүтээлчид болон загварын салбарын нөлөө бүхий эрхмүүд очдог. Мөн томоохон загвар зохион бүтээгчид өөрсдийн “Muse”, брэндийнхээ нүүр царай болсон алдартнуудтайгаа хамт оролцдог байна.
Энгийн хүмүүс Мет Галад оролцож болох уу?
Мет Галад оролцох хүмүүсийн жагсаалтыг улаан хивсний ёслол хүртэл нууцалдаг. Зочид нь зөвхөн урилгаар очдог бөгөөд гол зохион байгуулагч, Vogue сэтгүүлийн эрхлэгч Анна Винтур зочдынхоо жагсаалтыг нэгбүрчлэн өөрөө баталдаг учир хүссэн хүн болгон очиж чадахгүй. Тасалбар бүр нь 35,000$, бөгөөд ширээ нь 200,000-300,000$ үнэтэй байдаг. (Анх 1 тасалбар 50$ байсан)
Мет Гала дээрх хувцаслалт
Зохион байгуулагчдын зүгээс жил бүр онцгой сэдэв өгдөг ба уригдсан зочид нь тухайн сэдвийн дагуу хувцасладаг уламжлалтай. Тийм ч учраас загвар зохион бүтээгчдийн хувьд уг арга хэмжээ нь өөрсдийн гайхалтай ур чадвар, уран сэтгэмжээр сэдвийн дагуу хүссэн загвараа урлаж, олны танил одуудаар дамжуулан бүтээлч байдлаа харуулах боломж байдаг.
Энэ жилийн сэдэв юу байсан бэ?
Метрополитан урлагийн музейд гаргаж буй Америкийн загварын түүхийн үзэсгэлэнтэй холбогдуулж 2021 онд “Америкийн тусгаар тогтнол” гэсэн сэдэвтэй байсан бол энэ жилийн сэдэв нь түүний үргэлжлэл буюу 19-р зууны сүүл үеийн Америкийн загвараас сэдэвлэсэн “Gilded Glamour” ёслолын хувцас бэлдэх байлаа.
