Дэлхийн хамгийн нэр хүндтэй кино наадмуудын нэг болох 75 дахь удаагийн Каннын кино наадам энэ сарын 17-нд нээлтээ хийлээ. Жил бүр Францын далайн эрэг дээрх Канн хотод зохиогддог уг наадамд олон улсын жүжигчид, найруулагчид, зохиолчид гээд кино урлагийнхан цуглаж уулзалт хийн, хоорондоо санаа солилцож, гэрээ хүртэл байгуулдаг байна.
Каннын наадамд киноноос гадна загвар маш чухал байр суурийг эзэлсээр ирсэн. Өмнөх жилүүдийн улаан хивсний ёслолын дүр төрх, хувцаслалтууд нь дэлхийн загварын түүхийг өгүүлэх бөгөөд үе үеийн загварын шүтээнүүдийг эндээс харж болно. Ингээд Каннын кино наадмын загварын түүхэн зургуудаас хуваалцъя.
1947 он. София Лорен
Дэлхийн хамгийн үзэсгэлэнтэй бүсгүйчүүдийн нэг болох Итали гаралтай жүжигчин София Лорен 8 дахь удаагийн Каннын наадмын үеэр. Одоогийн алдартнуудтай харьцуулахад их энгийн бөгөөд элегант стилиэр хувцаслаж байжээ.
1956 он. Брижит Бардо
Кино од Брижит Бардо 1956 онд Каннын кино наадмын үеэр Каннын далайн эргээр хөл нүцгэн гүйж байгаа нь. Энэ онд Жак-Ив Кусто, Луи Маль нарын хамтран найруулсан “The Silent World” баримтат кино Palme d’Or буюу Каннын наадмын хамгийн дээд шагналыг авч байсан түүхтэй.
1957 он. Элизабет Тэйлор
1950-аад оны Холливудын од Элизабет Тэйлор 3 дахь нөхөр болох кино найруулагч Майкл Тоддын хамтаар 1957 оны Каннын кино наадам дээр ирж буй нь. Тансаг загварын мөр гаргасан даашинз, титэм, бээлий гээд л хувцаслалт нь түүнийг яг л хааны удмын язгууртан авхай шиг харагдуулж байна.
1966 он. Катрин Денев
Францын жүжигчин Катрин Денев 1966 оны Каннын наадмын үеэр фенүүдтэйгээ мэндчилж байгаа нь. Тэрээр 1960-аад оны тренд үс засалт, болон тухайн үеийн загварын онцлогийг харуулах богино ханцуйтай, шулуун загвартай даашинзаар гоёжээ.
1975 он. Энн-Маргрет
Швед гаралтай Америк жүжигчин Энн-Маргрет 1975 онд Каннын кино наадмын үеэр машин дээрээсээ зураг авахуулж буй нь. Цагаан өнгөөр дагнан монохром стилиэр хувцасласан Энн-Маргрет нь энэ удаагийн кино наадамд Английн кино найруулагч Кен Расселын найруулсан “Tommy” мюзикл киногоо сурталчилж байсан юм.
1987 он. Диана гүнж
Ард түмний хайртай Диана гүнж 1987 оны Каннын кино наадамд оролцсон нь. Түүний дуртай загвар зохион бүтээгчдийн нэг болох Кэтрин Уокер уг даашинзыг нь урласан бөгөөд 2011 онд дуудлага худалдаагаар 137,000$-р худалдаалагдсан байна.
1991 он. Мадонна
Дуучин Мадонна 1991 оны Каннын наадамд ирэхдээ алдарт загвар зохион бүтээгч “Jean-Paul Gaultier”-ын урласан дотуур хувцастай ирсэн нь улаан хивсний ёслолын хувьд маш зоригтой шийдэл байсан юм. Тэрээр “In Bed with Madonna” баримтат кинондоо зориулан ийнхүү хувцаслаж байжээ.
2021 он. Белла Хадид
2021 оны Каннын наадмын үеэр загвар өмсөгч Белла Хадид “Schiaparelli” брэндийн цээжин дээрээ алтлаг детальтай кутюр даашинз өмссөн билээ. Уг алтлаг деталь нь уушгийг дүрсэлсэн бөгөөд брэндийн бүтээлч захирал Дэниел Розберигийн бүтээл юм.
