Жил бүрийн долдугаар сард Майами арал дээр болдог “Miami Swim Week” нь хамгийн анх 1989-1998 онуудын хооронд зохион байгуулагдаж байсан ба 2005 онд цоо шинээр шинэчлэгдэж түүнээс хойш 10 дахь удаагаа зохион байгуулагдаж байгаа юм. Загварын салбар дахь нөлөө бүхий томоохон арга хэмжээ болох “Miami Swim Week” нь өдгөө усны хувцасны чиг хандлагыг тодорхойлдог гол арга хэмжээ билээ. 2022 оны 7-р сарын 13-18-ны хооронд “SLS South Beach” зочид буудалд зохион байгуулагдлаа. Тус тайзнаа 100 гаруй дизайнерууд 2023 оны зуны коллекцоо толилуулжээ.
“Eliad Cohen”
Загвар өмсөгч, хөтлөгч, influencer, эрэгтэй хувцасны загвар зохион бүтээгч Элиад Коэн нь Испани улсад үйлдвэрлэсэн хамгийн сүүлийн үеийн загварлаг эрэгтэй усны хувцасны коллекцоо олон нийтэд танилцуулан худалдаанд гаргасан байна.
“L.M. Swimwear”
Загвар өмсөгчдийн өвөрмөц нүүр будалт нь нэн түрүүнд үзэгчдийн сонирхлыг ихээхэн татсан ба сүүлийн үед эрчийг авч буй “Barbiecore” хөдөлгөөнтэй уялдуулан Колумбын загвар өмсөгч, influencer Лаура Монрой нь өөрийн “L.M. Swimwear” коллекцийн өнгө аясыг түлхүү ягаан өнгийн усны хувцсаар дагнажээ.
“Kittenish”
Эмэгтэйлэг, эгдүүтэй, секси дүр төрхийг нэгэн зэрэг цогцлоож чадсан тайз бол дуучин, ая зохиогч, бизнес эрхлэгч Жесси Жеймс Декерийн бүтээл болох “Kittenish” хэмээх нэртэй сэтгэл татам брэнд юм. Синди Прадо, Алекса Коллинз, Анжеле Бабич зэрэг нөлөө бүхий алдартнууд болон загвар өмсөгчид “Kittenish” брэндийн тайзнаа алхсан ба кантри болон поп хит дуунууд уг тайзыг чимжээ.
“Sports Illustrated Swim”
Өнгөрсөн бямба гаригт загварын салбарын шилдэг загвар өмсөгчдийн хамтаар “Sports Illustrated” сэтгүүл нь ээлжит загварын шоугаа “W South Beach”-ийн тайзнаа амжилттай зохион байгуулжээ. Тус тайзнаа Жасмин Сандерс, Камил Костек, Брукс Надер, Оливиа Понтон зэрэг усны хувцасны алдартай загвар өмсөгчид оролцжээ.
“Bikinilista”
Загварын ертөнцийн үүд хаалгаар орж ирж буй шинэхэн брэнд болох “Bikinilista” нь Милан хотод төвтэй бөгөөд “Miami Swim Week”-ийн тайзнаа Swarovski болроор чимэглэсэн нийт 16 бикини цуглуулгыг олон нийтэд танилцууллаа.
“Liliana Montoya Swim”
Усны хувцасны загвар зохион бүтээгч Лилиана Монтоягийн энэ зуны цуглуулга бүхэлдээ лусын дагина, шүрэн хад, далайн замаг зэргээс санаа аван урлагдсан явдал нь тун онцлог байсан бөгөөд энэхүү бүтээл нь “эмэгтэй хүн бүрийн гоо үзэсгэлэнг илүү тодотгож, лусын дагина мэт сэтгэгдэл төрүүлэх гол зорилготой” хэмээн тэрээр дурджээ.
“Pretty Little Things”
Тачаангуй эмэгтэй хувцасны брэнд болох “Pretty Little Things”-ийн загварын шоуны тайз бүхэлдээ одоор чимэглэгдсэн ба тод солонгон өнгөнүүдээс бүрдсэн коллекцийг олон нийтэд толилуулсан ба онцлох загвар өмсөгчдийн хувьд трансжендер од Токио Стайлс, загвар өмсөгч Мэрилин Мело болон Сьерра Скай, Жэйда Чейвс, София Жамора зэрэг нөлөөлөгч нар тайзнаа алхжээ.
“Normal Culture”
Өнөөгийн усны хувцасны чиг хандлагыг тодорхойлогч, хамгийн халуухан, эрэлттэй брэндүүдийн нэг болох “Normal Culture”-ийн загварууд хөгжилтэй, дэггүй, уян хатан хэв маягаараа үйлчлүүлэгчдийг ихээр татдаг билээ. Уг брэнд нь зөвхөн 175 ба түүнээс дээш өндөртэй эмэгтэйчүүдэд зориулан загвар гаргадаг бөгөөд “Miami Swim Week”-д коллекцоо толилуулж буй цөөхөн хэдэн боломжийн үнэтэй брэндүүдийн нэг юм.
“Kelly Killoren Bensimon”-ий үдэшлэг
Үл хөдлөх хөрөнгийн магнат, загварын редактор асан, номын зохиолч Келли Киллорен Бенсимон нь Майами арлын Кимптон зочид буудлын дээврийг тэр чигт нь доргиов. Энэхүү арга хэмжээнд амьд хөгжмийн үзүүлбэр, DJ сэт багтсанаас гадна алдарт загвар зохион бүтээгч Мелисса Одабаш нь хамгийн сүүлийн үеийн усны хувцасны коллекцоо олон нийтэд танилцуулсан байдаг.
