Энэ өвлийн хамгийн загварлаг 6 принт

Загвар
07
11сар
22

Хаундстут принт

Хаундстут принт нь загварын ертөнцөд маш чухал байр суурийг эзэлдэг. 1930-аад онд загвар зохион бүтээгч Christian Dior-ын алдаршуулж байсан уг үнэ цэнтэй принтийг загвар зохион бүтээгчид шинэчлэн 2022 оны өвлийн загварууддаа ашиглажээ. Yuhan Wang хаундстут принтийг ашиглан гоёмсог цацагтай хослол гаргасан бол Ami брэнд нь хэлхгэр загвартай урт пальто, Valentino даашинз болон богино юбка, Versace брэнд тансаг загварын даашинз зэргийг урлажээ.

Нарийн судалтай хээ

Хэзээ ч моданаас гардаггүй, хамгийн сонгодог загварын принт бол нарийн судалтай хээ юм. Уг хээ нь анх 19-р зууны эхээр банкны ажилтнуудын форм нь байсан ба 1980-аад оноос хойш эрэгтэй, эмэгтэйчүүдийн оффис хувцаслалтын салшгүй нэгэн хэсэг болсон байна. Харин өдгөө алдартай загварын брэндүүд шинэ коллекци гаргах бүртээ уг хээг онцолж өөрсдийн загварыг чимдэг. SACAI, Stella McCartney, Versace брэндийн шоунуудаас энэ жилийн тренд болж буй маш нарийхан судалтай хээг харж болно.

Ирвэсийн хээ

2022 оны загварын тайзан дээрх хамгийн том тренд бол амьтны хээ байсан. Ялангуяа энэ жил ирвэсийн хээ амьтны хаант улсыг эзэгнэж байна. Уг хээг 1950-аад онд Christian Dior хүмүүст анх таниулж байсан түүхтэй. Хэрхэн юутай хослуулж өмсөхөө анхааралтай сонгохгүй бол уг принтийг буруу ашиглавал загварын мэдрэмжгүй харагдах аюултай. Хэрвээ та амьтны хээг таашаадаг бол Roberto Cavalli, Michael Kors, Etro брэндүүдийн намар өвлийн загваруудаас ирвэсийн хээг хэрхэн хослуулж өмсөх гайхалтай санаануудыг аваарай.

Тартан шоотой хээ

Тартан хээ бол маргаангүй хамгийн урт удаан жилийн түүхтэй, 17-р зууны Шотланд дахь Кельтик үндэстнээс үүсэлтэй хээ юм. Тухайн үед гэр бүл болон бүс нутгаараа ялгарахын тулд уг хээг ашигладаг байжээ. Харин 1970-аад оноос “Панк хөдөлгөөн” гарч ирснээр Тартан хээг загварын тренд болгон өөрчилсөн билээ. Maryam Nassir Zade, Vivienne Westwood, Roberto Cavalli, Marine Serre зэрэг загвар зохион бүтээгчдийн намар өвлийн коллекциос тартан хээний орчин үеийн загварлаг хувилбаруудыг харж болно.

Нүцгэн биеийн алдаршуулах принт

Сүүлийн жилүүдэд гэрэлтдэг материалтай, ухлаадастай болон богино загваруудыг өмсөж биеийн хэсгүүдээ ил гаргаж, гайхуулах мода дэлгэрээд байгаа. Хэрвээ та хэтэрхий ил задгай хувцас өмсөж чаддаггүй бол биеийн хэсгүүдээс санаа авсан принттэй хувцас сонгож болох юм. Нүцгэн биеийн алдаршуулах принт нь Balmain, Y/Project брэндүүдийн өвлийн коллекцид зонхилж байсан бол Loewe, Ahluwalia, Akris брэндүүд гар, нүүр зэрэг биеийн бусад хэсгүүдийг онцолжээ.

Принтний мөргөлдөөн

Хоорондоо зохицолгүй принтүүдийг хольж, хослуулсан загварууд энэ оны чухал нэгэн тренд болоод байна. Ялангуяа Dsquared2 болон Ulla Johnson брэндүүдийн шинэ загвараас уг принтийг хэрхэн хослуулж styling хийж болохыг хараарай. Рatchwork техникийг ашиглан хэд хэдэн принтүүдийг хослуулан урласан хүрэм, даашинзнууд нь энэ жилийн хамгийн максималст тренд биш гэж үү?