Италийн алдарт Moschino брэндийн бүтээлч захирлаар сүүлийн 10 жил ажилласан загвар зохион бүтээгч Жереми Скотт нь саяхан брэндээ орхиж байгаагаа албан ёсоор мэдэгдсэн. Тэрээр өнгөрсөн 10 жилд “kitsch” хэв маягийг хүмүүст таниулж маш сонирхолтой, сенсац дагуулсан олон загварын шоунуудыг хийсэн билээ.

Америк гаралтай загвар зохион бүтээгч маань тод хурц өнгө, принтүүдээр тоглож загвартаа шингээх дуртай ба Барби, Спонж Боб, Микки Маус гэх мэт “Поп-соёл”-оос санаа авсан бүтээлч загваруудыг урлаж байсан. Цар тахлын үеэр хүртэл утсан хүүхэлдэйгээр виртуал загварын шоу хийж “Moschino”-гийн төсөөллийн ертөнцийг бүтээж байлаа. Ингээд түүний хамгийн сэтгэлд хоногшсон, гайхалтай загварын шоунуудаас эргэн дурсъя.

Moschino AW14

2014 оны Намар-Өвлийн шоундаа Жереми Скотт өргөн хэрэглээний соёлыг онцолжээ. Түргэн хоолны сүлжээ болох McDonald-с эхлээд, хүүхдүүдийн үзэх дуртай Спонж Боб, супермаркетуудад зарагддаг чипс, шоколад, сериал зэргийг принт болгон оруулж тансаг загвартай хослуулсан байна.

Moschino SS15

Барбины ертөнцөд тавтай морил! Жереми 2015 оны зуны коллекциороо Барбины ертөнцийг бүтээжээ. Шаргал үс, ягаан даашинз, гунхсан загвар өмсөгчид гээд л…зугаатай биш гэж үү.

Moschino SS18

Авьяаслаг загвар зохион бүтээгч маань 2018 оны хаврын коллекцийнхоо эхний хэсэгт балетыг 1990-ээд оны панк стильтэй хослуулсан бол 2 дахь хэсэгтээ үзэсгэлэнт цэцгийн хүрээлэнг дүрсэлжээ.

Moschino SS20

Алдарт зураач Пакассогийн гайхалтай бүтээлүүдээс санаа авч урласан уг коллекци нь яг л зотон даавуун дээр зурсан зургууд амилан тайзан алхаж буй мэт дүрслэлийг бүтээсэн байв.

Moschino SS21

Цар тахлын үеэр загварын шоу хийх битгий хэл гэрээсээ ч гарч болохгүй, хэцүүхэн цаг хугацааг бид өнгөрүүлсэн. Энэ үеэр загварынхан виртуал шоу хийж шинэ коллекциудаа танилцуулсан ба Moschino ч мөн 2021 оны Хавар-Зуны шоугаа виртуал маягаар толилуулсан. Шоуны гол онцлог нь утсан хүүхэлдэйгээр загвар өмсөгчид болон үзэгчдийг дүрсэлсэн ба урд эгнээнд Vogue сэтгүүлийн ерөнхий редактор Анна Винтурыг сууж буйгаар дүрсэлсэн нь бодит мэт харагдана.