Gucci гэхээр л брэндийн бүтээлч захирал Alessandro Michele-гийн сүүлийн хэдэн жил гаргасан гайхалтай өвөрмөц, максималист загварууд, эсвэл нилээд хэдэн жилийн өмнө дизайнер Tom Ford-ын шуугиан тарьж байсан задгай загварууд болон нүцгэн зураг авалтууд санаанд ордог. Харин энэ бүгдээс өмнө Gucci нь энгийн нэгэн арьсан эдлэлийн дэлгүүрээр гараагаа эхэлж байсан юм.
Италийн арьсан эдлэл урлагч Guccio Gucci нь анх Английн Лондон хотын зочид буудалд гийчдийн ачааг зөөдөг байхдаа чемодан, аяллын цүнх зэргийг ихээхэн сонирхох болжээ. Тэрээр Италийн Флоренцод буюу эх нутагтаа эргэж ирээд Franzi хэмээх чемодан, тээшний брэндэд ажиллах болсон байна. Хэдэн жилийн дараагаас өөрийн бизнесийг эхлүүлж, Gucci брэндийн анхны дэлгүүрийг 1921 онд Флоренц хотод нээж байжээ.
Анх морины эмээл болон бусад хэрэгслүүдийг Италийн хамгийн сайн чанарын арьсаар хийдэг байсан нь олны таашаалд нийцэж, цаашлаад Английн язгууртнуудын дунд танигдаж нэр хүндийг олжээ. Тэдний одоогийн арьсан эдлэл, цүнхнүүдэд морины эмээл болон бусад хэрэгслээс санаа авсан деталиуд их харагддаг нь үүнээс үүдэлтэй.
Түүний 3 хүү Aldo, Vasco, Rodolfo нар 1938 оноос хойш бизнесийн үйл ажиллагаанд нь оролцож эхлэн Ром, Милан зэрэг хотуудад дэлгүүрээ нээж брендээ өргөжүүлсэн. Харин 1930 оны дунд үеэр Италид арьс хэрэглэх шинэ хууль гарч торгууль зааснаар зөвхөн арьсан эдлэл хийхэд хүндрэлтэй болсон тул өөр материалууд турших болжээ. Үүнээс улбаалан Маалинган даавуун дээрх жижиг хар алмаазаар холбогдсон Gucci- гийн таних тэмдэг болсон анхны принт үүсжээ.
Түүнчлэн 1947 онд Дэлхийн 2-р дайны сүүлээр материал хомс байснаас болж Gucci- ийн гар урлалчид Японы хулс модоор цүнхний бариул хийж эхэлсэн байна. Сонирхолтой нь энэ цүнх Gucci-гийн хамгийн алдартай загваруудын нэг болсон юм. 1953 онд анхныхаа Америк дахь салбарыг Нью Йорк хотод нээснээр Америкийн хэрэглэгчдэд хүрч эхлэв. Ийнхүү Холливудын одуудад таашаагдах болсноор үүнээс хойших 10 жилийг Gucci-гийн Алтан үе гэж нэрлэдэг. Харамсалтай нь Guccio Нью Йорк дахь дэлгүүрээ нээсний дараахан удалгүй нас нөгчжээ.
Elizabeth Taylor, Peter Sellers, Jackie Kennedy, Grace Kelly зэрэг алдартнууд Gucci-гийн цүнхийг барьж олны хараанд өртөж байсан билээ. Үүнээс гадна Rodolfo Gucci нь Монакогийн гүнж Grace Kelly-д зориулан Италийн иллюстратор зураач Vittorio Accornero-гоор цэцгэн хээтэй алчуур бүтээлгэсэн нь “Flora” нэрээр алдаршиж, үүнээс хойш Gucci-гийн алдартай цэцэг, навч, шавжны дүрс бүхий 43 төрлийн принт бүтээгджээ. Мөн энэ үеэр Guccio Gucci- гийн дурсгалд зориулан 2 G үсэгнээс бүтсэн одоогийн бидний мэдэх логог бүтээсэн байна.
1970, 1980-аад он Gucci брэндийн хувьд уналттай он жилүүд байсан нь өв залгамжлагч нарын таарамжгүй харилцаанаас болсон төдийгүй тус брэнд бараг л дампуурах шахсан гэж хэлж болно. Харин загвар зохион бүтээгч Tom Ford 1990 онд Gucci-гийн бүтээлч захирал болсноор уг брэндийн аврагч болсон билээ.
Тэрээр брэндийн имижийг эрс өөрчилж, минималист хэв маяг зонхилж байсан 90-ээд онд бариу даашинз, өндөр өсгийт, илүү дур булаам загваруудыг гаргаж бусдаас ялгарч чадсан юм. Түүнчлэн чадварлаг стилист Carine, шилдэг зурагчин Mario Testino нартай хамтран дээд зэрэглэлийн загварын концептийг эрс өөрчилж илүү нүцгэн, секси, жинхэнэ шуугиан тарьсан зураг авалтуудыг хийж Gucci-гийн борлуулалтыг 10 тэрбум доллар болгож өсгөж байсан түүхтэй. Тэрээр 2004 онд сүүлийн коллекцио танилцуулаад брэндээ орхисон ба Frida Giannini дараагийн бүтээлч захирлаар томилогдон 10 жилийн турш ажилласан.
Харин Alessandro Michele 2015 оноос эхлэн Gucci брэндийн бүтээлч захирлаар ажиллах болсон ба үүнээс өмнө тэрээр тус компанид 12 жилийн турш өөр өөр албан тушаалд ажиллаж байжээ. Тэрээр бүтээлч захирал болсон даруйдаа өмнөх дизайнерын бүтээсэн 2015 оны намар өвлийн эрэгтэй коллекцийг шоунаас тавхан хоногийн өмнө бүгдийг нь өөрчилж, загваруудыг ахин шинэчилж байсан. Үүнээс 1 сарын дараа Милан дахь эмэгтэй загварын шоу нь маш амжилттай болсноор Michele өөрийнхөө чадварыг батлан харуулсан байна. Тэрээр өөрийнхөө төсөөллийн ертөнц, өвөрмөц хэв маягаар Gucci-гийн классик стилийг өөрчлөн максималист мөрөөдлийг бүтээсэн гэлтэй. Түүний коллекциуд ихэвчлэн “pop culture”-аас санаа авсан байдаг ба тод хурц өнгөнүүд, олон давхар хуниастай деталиуд, бяцхан луун хүүхэлдэй, сэрдхиймээр хиймэл толгой зэрэг олон гайхмаар сюрпризүүдийг тайзан дээр харуулсан билээ. Энэ бүгд брэндийн борлуулалтыг 11% өсгөж, Gucci-г эргээд бүхний анхаарлыг татсан “it” бренд болгож чадсан юм.
Сонирхуулахад, Michele нь 2018 онд брэндийн өв уламжлал, баялаг түүхийг бусдад түгээхийн тулд “Gucci Garden” музейг Флоренц хотын “Palazzo della Mercanzia” түүхэн ордон дотор байгуулсан. Уг музей нь Флоренц хотын төв гудамжинд байрлах ба дотроо музейгээс гадна Итали загварын хээнцэр дотоод засал бүхий нэрийн дэлгүүртэй.
