Саяхан болж өнгөрсөн 93 дахь удаагийн Оскарын наадмын шилдэг хувцас дизайны шагналыг “Ma Rainey’s Black Bottom” киногоор загвар зохион бүтээгч Ann Roth хүртжээ. Уг шагнал нь түүний 2 дахь удаагаа авч буй Оскар бөгөөд урьд нь 1997 онд ‘The English Patient’ киноны хувцаслалтаар мөн шагнуулж байжээ. Тэрээр одоо 89 настай ба Оскарын шагнал хүртсэн хамгийн өндөр настай эмэгтэй болсон юм.
Ann Roth нь кино болон Broadway шоуны хувцас дизайнер бөгөөд мэргэжлээрээ олон жил ажиллахдаа бидний мэдэх нилээд хэдэн алдартай бүтээлүүд дээр ажилласан. Тухайлбал, тэрээр The Hours, The Talented Mr. Ripley , Places in the Heart, The World of Henry Orient, Midnight Cowboy, Working Girl, The Good Shepherd, Margot at the Wedding, Mamma Mia!, ‘Evening’ зэрэг шилдэг дэлгэцийн бүтээлүүдийн хувцас дизайныг гаргасан.
Харин сая Оскарын шагнал хүртсэн ‘Ma Rainey’s Black Bottom’ киноны хувьд 1920 оны нэр нөлөө бүхий блюз дуучин Ma Rainey-гийн амьдрал гарах ба түүний хамтлаг, карьер, тухайн үеийн арьс өнгөний үзэл зэрэг сэтгэл хөдөлгөм үйл явдлуудыг харуулсан байна.
Загвар зохион бүтээгч Ann Roth кино зохиолыг уншчихаад өөрөөсөө дүрийн талаарх олон асуултуудыг асууж, дүрээ бүрэн тодорхойлохуйц хувцаслалт бүтээхийг хичээдэг гэнэ. Уг киноны гол дүрийн чадварлаг дуучин Ma нь цагаан арьст хүмүүс ноёрхсон цаг үед өөрийгөө тэдэнд хүлээн зөвшөөрүүлэхийн тулд албаар маш тансаг, хээнцэр хувцсыг сонгож өмсдөг байсан. Ялангуяа шоу бизнесийн ертөнцөд тэр хэн бүхнээс ганган харагдах шаардлагатай байсан нь түүний хувцаслалтын стильд хамгийн их нөлөөлсөн хэмээн Ann Roth киноны талаар ярихдаа дурдсан юм.
