Парисчууд хамгийн загварлаг хүмүүс гэдгээрээ дэлхий дахинаа алдартай билээ. Тэдний өөрсдийн гэсэн онцлог хэв маяг, хэтэрхий гял цал биш, хичээгээгүй ч юм шиг хэрнээ загварлаг дүр төрхөөс бид бүгд суралцахыг хүсч, байнга л ямар нэгэн тип цуглуулж, хэзээд гайхалтай харагддаг нууцаас нь мэдэхийг хүсдэг шүү дээ. Тиймээс ч Парисчуудын хувцаслалтын бяцхан нууцаас дэлгэж, тэдний хэрхэн зузаан ноосон цамцыг загварлаг өмсдөг талаарх зөвлөгөөг хуваалцаж байна.
1. Бүслэх
Хувцаслахдаа бүх зүйлийг тэнцвэртэй байлгах хэрэгтэй. Жишээ нь: Дээгүүрээ сул загвартай цамц өмссөн бол доогуураа бариу өмд өмсөх гэх мэт. Түүнчлэн хэлхгэр ноосон цамцаа даашинз эсвэл юбкатай хослуулсан бол бэлхүүсээрээ бүс бүслэж жинхэнэ Франц дүр төрхийг бүрдүүлээрэй.
2. Кардиган цамцаа буруу харуулж өмсөх
Парист анх үүсгэн байгуулагдсан Sézane брэнд энгийн кардиган цамцыг эргүүлж харуулаад л цоо шинэ хэв маягийг өнгөрсөн онд гаргаж ирсэн билээ. Үүнээс хойш дизайнериуд зөвхөн кардиган ч биш товчгүй ноосон цамцнуудыг уг хэв маягаар өмсөх зориулалттай зохион бүтээж, ард нь гоёмсог деталиуд нэмж хийх болсон.
3. Энгийн деталь болон чимэглэл сонгох
Францууд угийн олон төрлийн өнгө, хээ хуартай загвар таашаадаггүй. Тиймээс ч тэдний хувьд гоёмсог хэлбэрээр нэхсэн загварууд нь илүү тохиромжтой бөгөөд дэгжин шийдэл байх болно.
4. Зузаан ноосон цамцаа богино юбкатай хослуулах
Францууд эрх чөлөөг их эрхэмлэдэг бөгөөд ялангуяа өөрсдийн биеийг хааж нуугаад байдаггүй үнэхээр чөлөөт сэтгэлгээтэй улс. Гэхдээ загварын хувьд тэд тэнцвэрт байдалд дуртай. Хэрвээ хөлөө ил гаргасан бол дээгүүрээ битүү хувцас өмсөх эсвэл энгэр задгай загвар өмссөн бол доогуураа өмд эсвэл урт даашинз өмсөх зэрэг бичигдээгүй хуультай гэж хэлж болно. Тиймээс ч өвлийн зузаан цамц өмссөн үедээ тэд богино юбка өмсч хөлөө гайхуулах дуртай. Доогуур нь урт түрийтэй гутал өмсч дулаан байх нь бас чухал шүү.
5. Jeanne Damas-ых шиг богино кардиган өмсөх
Сүүлийн хэдэн жилийн турш кардиган цамцны тренд давалгаалаад байгаа. Харин Франц маягаар хувцаслахыг хүсвэл Rouje брэндийн үүсгэн байгуулагч, Инстаграм од Jeanne Damas-аас санаа авч кроп буюу тайрсан мэт богино загварын кардиган сонгож өмсөөрэй.
