Данийн алдарт гоёл чимэглэлийн Пандора брэнд нь байгалиас олборлосон алмаз цаашид ашиглахгүй гэдгээ мэдэгдлээ. Үүний оронд илүү байгальд ээлтэй сонголт буюу лабораторид хиймэл аргаар хийгдсэн алмазаар гоёл чимэглэлээ хийх юм байна. Гэсэн хэдий ч харагдах байдал, шинж чанарын хувьд жинхэнэ алмазнаас ялгарахгүй ба худалдаалагдахаасаа өмнө “4Cs” буюу зүсэлт, өнгө, тунгалаг байдал, карат зэрэг байгалийн алмазтай нэгэн адил шалгуураар үнэлэгдэх юм байна. Уг коллекци нь ирэх жилээс Pandora Brilliance нэртэйгээр худалдаанд гарахаар төлөвлөгджээ
Пандора брэндийн хувьд сүүлийн жилүүдэд байгаль орчинд ээлтэй байх тал дээр нэлээдгүй анхаарч байгаа. Тухайлбал, Пандора брэнд одоогийн байдлаар нийт үнэт эдлэлийнхээ 71%-г ахин боловсруулсан алт, мөнгөөр урладаг бөгөөд 2025 он гэхэд зөвхөн ахин боловсруулсан алт, мөнгийг ашиглаж гоёл чимэглэл хийх зорилт тавиад байгаа юм. Түүнчлэн шинэ коллекциуд нь дунджаар 60% сэргээгдэх эрчим хүч ашиглагдаж хийгддэг. Харин шинэ алмазтай коллекцио 100% сэргээгдэх эрчим хүч ашиглаж хийхээр төлөвлөж байна.
Судалгаагаар үзэхэд залуу хэрэглэгчдэд бүтээгдэхүүний байгаль, нийгэмд ээлтэй байдлаар хийгдсэн эсэх нь худалдан авах шийдвэрт нь ихээр нөлөөлдөг болох нь батлагджээ. Тиймээс ч Пандорагийн хамгийн чухал зорилтууд нь бүтээгдэхүүнээ хариуцлагатайгаар үйлдвэрлэх, ажилчиддаа тухтай орчин бүрдүүлэх, байгальд учруулах гарз хохирлыг багасгах болоод байгаа юм.
