Gucci Beauty брэндийн анхны Дауны синдромтой загвар өмсөгч болох Элли Голдстэйныг танилцуулж байна. Тэрээр 5 настай байхаасаа л загвар өмсөгч эсвэл алдартай нэгэн болохыг мөрөөдсөөр ирсэн ба 15 настайгаасаа Zebedee Management моделийн агентлагт орж фото моделиор ажиллаж эхэлжээ. Элли одоо 19 настай ч Gucci, Nike, Vodafone, Superdrug зэрэг бидний сайн мэдэх олон алдартай брэндүүдийн нүүр царай болж байсан чадварлаг модель юм. Түүний загварын сэтгүүлүүдэд өгсөн ярилцлагуудын богино түүврийг хүргэе.
Өөрийхөө талаар танилцуулаач? Хаана өсөж торнисон бэ?
Би Английн Илфорд хотод өсөж торнисон. Бусдын л адил цэцэрлэг, бага сургууль, дунд сургуульд сурч байсан. Одоогоор коллежид Урлагийн ангид суралцаж байгаа.
Өнөөдрийг хүртэлх карьерын тань хамгийн онцлох мөч юу байсан бэ? Цаашид яг юунд зорьж байна вэ?
Карьерын маань хувьд хамгийн онцлох мөч бол Gucci брэндийн нүүр царай болж байсан үе байсан. Тэдний инстаграм миний зураг авалтыг оруулсны дараа өмнө нь авч байгаагүй хамгийн олон лайк болон 900,000 гаруй сэтгэгдэлтэй болсон байсан нь гайхалтай санагдаж байлаа. Би хийж байгаа ажилдаа үнэхээр дуртай. Учир нь зураг авалт болгон өөр өөрийн онцлогтой байдаг бөгөөд олон гайхалтай хүмүүстэй уулзах боломжийг олгодог. Ирээдүйд ахин Gucci болон өөр бусад брэндүүдтэй ажиллаж сэтгүүлүүдийн нүүрэнд гарах боломж олдоно гэдэгт итгэж байгаа. Primark, Kurt Geiger, Sports Direct зэрэг олон гайхалтай брэндүүдтэй хамтран ажилласандаа баяртай байдаг.
Таны хувьд гоо сайхан гэж юу вэ?
Миний хувьд гоо сайхан гэдэг нь өөрийнхөөрөө байж, бусдад өөрийгөө байгаагаар нь таниулах
Өөрийн зүгээс гоо зүйг 3 үгээр тодорхойлбол?
Үзэсгэлэнтэй, аз жаргалтай, хүлээн зөвшөөрөхүйц
Хэрвээ та ямар нэгэн үлгэрийн баатар байсан бол хэн байх байсан бол?
Би цайвар цагаан арьстай учир цасан цагаантай илүү ойрхон санагддаг.
Та хэзээ өөрийгөө хамгийн үзэсгэлэнтэйгээр мэдэрдэг вэ?
Би гадагш гарахаар бэлдэн нүүрээ будаж байхдаа эсвэл зураг авалтын үед өөрийгөө хамгийн үзэсгэлэнтэйгээр мэдэрдэг.
Та энэ ертөнцөд юуг өөрчлөхийг хүсэж байна вэ?
Хүмүүс бусдын хэлбэр, хэмжээ, хөгжлийн бэрхшээлтэй эсэх, гаднах үзэмжээр дүгнэхгүй, хүн бүрийг байгаагаар нь хүлээн зөвшөөрдөг байгаасай.
Та Дауны синдромтой цөөхөн моделиудын нэг. Өөрийнхөө туршлагаас хуваалцвал?
Дауны синдромтой байх нь надад тийм ч хэцүү санагддаггүй. Би их өөдрөг, ааш зан сайтай учраас тийм байж ч магадгүй. Ганц бэрхшээл нь брэндүүд болон хүмүүстэй гэрээ хийхэд тэд над руу бус ээж рүү маань илүү хандаж ярих гээд байдаг. Надад зарим зүйлсийг суралцахад бага зэрэг хугацаа шаардах ч яг л бусдын адил хүмүүстэй харилцаж, хамтран ажиллаж чадна шүү дээ.
Үүнийг яаж даван туулдаг вэ?
Би өөрийнхөөрөө л байхыг хичээдэг. Хүмүүс надтай танилцаад, харилцаад ирэхээрээ инээмсэглээд л хандлага нь их өөр болдог. Хүмүүс бидэн шиг хөгжлийн бэрхшээлтэй хүмүүсийг үл ойшоох биш, бидэнд боломж олгох хэрэгтэй.
Ирээдүйд гоо сайхны салбар хэрхэн өөрчлөгдөх бол?
Гоо сайхны салбар ирээдүйд илүү хүртээмжтэй, төрөл бүрийн хүмүүсийг хамруулдаг болох байх.
