2021 оны Миланы эрэгтэй загварын 7 хоног саяхан болж өнгөрлөө. Загварын 7 хоногт Giorgio Armani, Prada, Dolce&Gabbana зэрэг Италийн томоохон брэндүүд оролцож 2022 оны хавар зуны шинэ коллекциудаа дижитал болон бодит шоу хийж танилцууллаа.
Giorgio Armani Men Spring 2022
Өмнө нь 800 гаруй зочидтой хийдэг байсан загварын шоугаа Giorgio Armani энэ удаад маш цомхон 80 хүнтэйгээр Милан дахь хуучин төв оффисынхоо байранд хийжээ. Энэ удаагийн коллекци нь Armani-гийн үндсэн хэв маяг болох минимал, даруу, тансаг зэрэглэлийн хирнээ бага зэрэг секси дүр төрхийг агуулсан гайхалтай загваруудыг багтаасан байлаа. Түүнчлэн ажил хэрэгч хослолуудыг илүү чөлөөт, спорт маягийн загвартай болгосон нь шинэлэг шийдэл байсан. Цар тахлаас хойш хүмүүс илүү биед амар чөлөөт хэв маягаар хувцаслах болсон тул коллекцийн чиг хандлага ч мөн ялгаагүй албаны бус, хэт гоёж гангалсан биш, биед эвтэйхэн загварууд болон өөрчлөгджээ.
Prada Men Spring 2022
Prada энэ удаад өөдрөг үзэл, итгэл найдвар, гэрэлт ирээдүйг дүрсэлсэн шинэ коллекцийнхоо сонирхолтой видеог танилцуулсан. Байгальд, тэр дундаа далайн эрэг дээр хийсэн зураг авалтаас нь яг одоо бидэнд хамгийн ихээр дутагдаж байгаа жинхэнэ эрх чөлөө мэдрэгдэж байлаа. Өнгөлөг цэцгэн принттэй малгайтай цамцнууд, гурвалжин Prada логотой коршокон малгай, богино шорт, наймаалжны зурагтай үргэлж хослол зэрэг чөлөөт загварын илүү залуучуудад зориулсан орчин үеийн чиг хандлагатай коллекци болжээ.
Dolce&Gabbana Men Spring 2022
Италийн өмнөд хэсэгт түгээмэл болдог шашны үйлээс гаралтай “luminaire” гэрлийн шоунаас Dolce&Gabbana брэнд шинэ коллекцийнхоо санааг олжээ. Милан дахь Metropol төвийн загварын тайзыг яг л Пулия мужид болдог сүмийн гэрлийн наадам шиг болгон чимэглэсэн нь их сүртэй харагдаж байлаа. Гэрлийн наадам, гэр бүлийн халуун уур амьсгал, гар урлал зэрэг нь жинхэнэ Итали өв уламжлал билээ. Тиймээс ч ийм өнгө аястай шоугаа хийсэн нь цаанаа их учир утгыг агуулж байгаа хэмээн брэндийн үүсгэн байгуулагчдын нэг Габбана тайлбарласан юм. Түүнчлэн гэрэл бол гайхалтай сэтгэл зүйн эмчилгээ болдог учир энэ цаг үед бидэнд гэрэл, баяр хөөр, аз жаргалыг харж мэдрэх нь хамгийн чухал гэжээ.
