2020 онд цар тахал, хөл хорионоос шалтгаалан загварынхны хувьд хүндхэн жил болж өнгөрсөн. Гэсэн ч өнгөрсөн намар брэндүүд өөрсдийн загварын шоугаа бүтээлч сэтгэлгээгээ ашиглан янз бүрийн байдлаар үзэгчиддээ хүргэсэн. Зарим нь цөөхөн зочидтой, хоорондоо зайтай суудлууд бэлдэн загварын шоугаа хийсэн бол нөгөө хэсэг нь бүтээлч байдлаар загварын сонирхолтой бичлэгүүдийг хийж байсан. Ямар ч байсан өөрсдийн нөхцөл бололцоогоо ашиглан үзэгч бидэнд загварын 7 хоногийг тасалдуулалгүй шинэ цуглуулгуудаа толилуулж чадсан.
Харин тэр дунд хамгийн онцлох томоохон загварын трендүүд юу байв гэдгийг та бүхэнтэйгээ хуваалцъя.
1. Монохром
Монохром буюу хар цагааны хослолыг Dolce & Gabbana, Chanel, Maison Margiela-гаас эхлээд олон брендүүд шинэ коллекцидоо шингээжээ. Энгийн бөгөөд хэзээд гайхалтай харагддаг сонгодог өнгөний хослол шүү дээ.
2. Уяатай загварууд
Нарийн уяагаар биеийг ороосон загварууд Charlotte Knowles, Supriya Lele, Versace, Christopher Esber and Victoria Beckham зэрэг брэндүүдийн хавар зуны шоунуудад нилээд харагдаж байсан. Уг деталь нь загварынхны дунд шүдний утас хэмээн нэрлэгддэг байна. Ялангуяа цээживчийг урт юбкатай нь биеийг ороож холбосон загварууд Инстаграмаар жинхэнэ тренд болоод байгаа.
3. Урт макси загварууд
Газар шүргэсэн урт, намирсан даашинзууд тренд болсон хэвээр л байна. Романтик, эмэгтэйлэг, тансаг дүр төрхийг бүрдүүлэх уг загварууд Dior, Alberta Ferretti, Valentino, Erdem , Michael Kors зэрэг томоохон брэндүүдийн загварын тайзыг чимж байсан.
4. Өргөн өмд
Бариу жийнсний эрин үе дуусаад өргөн өмдний тренд эргэн ирээд байгаа билээ. Илүү өргөн, урт загвартай байх тусмаа загварлаг харагдах болно.
5. Нөмрөг
Нөмрөг гэхээр л баатрууд, уран зөгнөл, үлгэрийн ертөнц санаанд ордог шүү дээ. Тэгвэл бид бүхэн загвараар дамжуулж өөрсдийн уран зөгнөлт төсөөллийн ертөнцдөө хүрэхэд Loewe, Rick Owens, Valentino , Emilia Wickstead, Chanel зэрэг алдартай брэндүүд гайхалтай загваруудаараа туслах нь.
6. Диско бүжигт
Үдэшлэгт зориулагдсан гялалзсан материалтай даашинзууд 2021 оны бас нэгэн голлох тренд болоод байна. Celine бренд гоёмсог гялалзсан хар даашинзыг саравчтай малгай, спорт гуталтай хослуулснаар тун өвөрмөц өдөр тутмын глам дүр төрхийг харуулжээ. Түүнчлэн Balmain, Louis Vuitton, Paco Rabanne, Valentino , Chanel, Elie Saab зэрэг олон брэндүүд уг беластиктай гялалзсан материалаар гайхалтай загварууд урлажээ.
7. Корсет эргэн ирсэн нь
Энэ хавар зуны коллекцид уламжлалт корсетыг орчин үеийн гудамжны загварын хэв маягт оруулж зохион бүтээсэн сонирхолтой загварууд зонхилж байсан. Givenchy, Vivienne Westwood, Alexander McQueen, Moschino , Philosophy di Lorenzo Serafini брэндүүдийн загварын шоунуудад корсеттай гоёмсог загварууд зонхилж байсан.
8. Торон загварууд
Шинэ оны бас нэгэн өвөрмөц тренд бол загасны тор шиг материалтай загварууд байлаа. Бие барьсан боди дээр давхарласан торон хүрэм, даашинз, нөмрөг, эсвэл хувцасны гадуур өмсүүлсэн торон оруулгууд гээд торыг олон янзаар ашигласан байсан. Loewe , Fendi, Bottega Veneta, Valentino зэрэг загварын ертөнцийг тодорхойлогчдын шоунаас эдгээр дэгжин бөгөөд өвөрмөц загваруудыг харж болно.
