Дэлхийн хамгийн алдартай загварын арга хэмжээ болох Нью-Йоркийн загварын долоо хоногийг хамгийн анх 1943 онд Нью-Йоркийн загварын хэвлэлийн дарга асан Eleanor Lambert санаачилж байжээ. Дэлхийн загварын дөрвөн том долоо хоногийн нэг ба үүнд Парис, Лондон, Милан хотуудын загварын долоон хоногууд багтдаг. Жил бүрийн хоёр ба 9-р сард зохион байгуулагддаг Нью-Йоркийн загварын долоо хоног нь олон улсын дизайнеруудын шинэ загварын коллекцийг худалдан авагчид, хэвлэл мэдээлэл болон олон нийтэд танилцуулах зорилготой арга хэмжээ юм.

Нью-Йоркийн загварын долоо хоног нь өнгөрсөн хоёр улирлын турш голдуу цахим хэлбэрээр зохион байгуулагдсан бол энэ жилийн хувьд ихэнх загварын шоунуудад биечлэн оролцох боломжтой болсон. Оролцогчид ба үзэгчид вакцины бичгээ зохион байгуулагч нарт харуулахад л хангалттай аж.
Сонирхуулахад, Ulla Johnson-ы загварын шоу Brooklyn Botanic Garden буюу алдарт цэцэрлэгт хүрээлэнд болж өнгөрсөн бол LaQuan Smith шоугаа Америкийн таних тэмдэг болсон Empire State Building-т хийжээ. Үүнээс гадна алдарт загвар өмсөгч Gigi Hadid загварын тайзнаа эргэн ирж Proenza Schouler-н тайзнаа алхан мөн “plus-size” моделиуд болох Precious Lee, Candice Huffine нар Christian Siriano-н загварын шоунуудад тус тус оролцжээ. Харин үзэгчдийн суудалд Холливудын жүжигчид болох Katie Holmes, Alicia Silverstone, реппер Lil Kim нар харагдаж байлаа.