Мода эргэдэг гэдэг шиг 2000-аад оны тренд загварууд энэ онд эргэн ирээд байна. Мөргүй топоос эхлээд мини юбка, хуванцар гутал, гялтгар материал гэх мэт олон хуучны загварууд 2022 оны загварын тайзан дээр ажиглагдсан. Тэгвэл энэ зун тренд болж буй хуучныг санагдуулам 2000 оны загваруудаас танилцуулъя.
Гялтгар чимэглэл
Парис Хилтоны алдарт гялалзсан диско даашинзаас эхлээд гялтгар материалтай хувцас, шигтгээтэй чимэглэл, аксессуар гэх мэт гялтгар бүхэн моданд орж байсан үе бол 2000-аад он билээ. Тэгвэл 2022 оны зун эдгээр загварууд эргэн дэлгэрэх нь .
Мөргүй топ
Алдарт “Sex and the City” цувралын гол дүр болох Керри Брэдшоу, поп од Бритни Спирс, супермодель Наоми Кэмпбелл нарын 1990, 2000-аад онд өмсдөг байсан мөргүй топ 2022 онд эргэн ирээд байна. Энгийн хэрнээ загварлаг уг топийг карго өмдтэй эсвэл сул даавуун өмдтэй хослуулж өмсөөрэй.
Мөрний цүнх
Сүүлийн жилүүдэд “It” цүнх болоод буй жижиг мөрний цүнх мөн л 2000-аад оны загвар юм. Парис Хилтоныг мөрний цүнхэндээ бяцхан нохойгоо хийгээд авч явдаг байсныг санаж байгаа биз дээ.
Хуванцар гутал
PVC буюу хуванцар материалаар хийсэн, өндөр өсгийтэй сандаал бол жинхэнэ үдэшлэгийн гутал юм. Уг секси загварыг мини даашинз, эсвэл богино юбкатай хослуулбал хөлийг урт нарийн харагдуулах ба жийнс, пиджактай хослуулан илүү “business casual” дүр төрхийг бүрдүүлж болно.
Бандана
2000 оныг шууд санагдуулдаг аксессуар бол Бандана юм. Тухайн үеийн поп одууд болох Кристина Агилера, Мaрайя Кэри, Бритни Спирс уг загварыг үнэхээр тренд болгож чадсан. Харин энэ зун банданаг толгойдоо биш майк болгож өмсөх нь тренд болоод байна.
Шинэчлэгдсэн Бохо стиль
Өмнө нь бохо стиль зүгээр нэг тренд байгаагүй, бүхэл бүтэн амьдралын хэв маяг байлаа. Бохо стилийн хамгийн том төлөөлөгчид бол жүжигчин Сиенна Миллер, супермодель Кейт Мосс нар байсан юм. Уг стиль нь энэ онд шинэчлэгдэж илүү өдөр тутамд өмсөхөд тохиромжтой болсон. Тухайлбал, сул загварын даавуун даашинз, илгэн хантааз, ковбой гутал, унжлагатай цүнх зэрэг загварууд 2022 оны тренд болоод байна.
Карго өмд
1990, 2000-аад онд моданд орж байсан карго өмд нь 2022 онд эргэн ирж алдартнуудын дуртай загваруудын нэг болсон билээ. Сул өргөн загвартай, олон халаастай уг өмд нь Америк жуулчдын өмсдөг, үзэмж муутай хэмээн шүүмжлэгддэг байсан бол орчин үед загварын чиг хандлагыг тодорхойлох болсон байна.
Биеэ ил гаргах
Өглөө эртлэн босч фитнесст явсан хэргээ одоо л гаргах цаг ирлээ. Энэ зун богино топийг мини юбка эсвэл сул өмдтэй уяагаар холбож гэдсээ ил гаргасан загварууд тренд болж байна. 2000-аад оноос эргэж ирсэн уг загварыг Кендалл Женнер, Белла Хадидын хувцаслалтаас харж болно.
Мини юбка
Өдөр тутмын жийнсэн загвараас эхлээд бариу мини юбка, хуниастай спорт загварын юбка зэрэг төрөл бүрийн богино юбканууд 2022 оны тренд болоод байна. Орой найзуудтайгаа уулзахаар гарах гэж байвал өндөр өсгийтэй сандаалтай, харин өдөр тутамдаа урт оймс болон хөлд эвтэйхэн кеттэй хослуулж өмсөөрэй.
