Дэлхийн хамгийн нэр хүндтэй кино наадмуудын нэг болох 2022 оны Каннын кино наадам үргэлжилсээр байна. Жил бүр Францын далайн эрэг дээрх Канн хотод зохиогддог уг наадамд олон улсын алдартай жүжигчид, найруулагчид, зохиолчид гээд кино урлагийнхан цугладаг билээ.
Кино наадамд ирсэн алдартнуудаас загварлаг хувцаслалт, үзэсгэлэнт дүр төрхөөрөө онцгойрч байсан нэгэн бол яах аргагүй жүжигчин Энн Хэтэуэй байлаа. Түүний ялдамхан дүр төрх, 1960-аад оныг санагдуулам дэгжин хувцаслалт, үс засалт зэрэг нь олны харааг булааж чадсан юм.
Тэрээр Нисийн онгоцны буудалд ирэхээсээ авахуулаад л стиль бүрдүүлэлтдээ нэлээдгүй анхаарсан нь харагдсан бөгөөд Каннын кино наадмын улаан хивсний ёслолд ирэхдээ “Armani Privé”-ийн тансаг загварын минимал даашинз өмссөн нь түүний гоо үзэсгэлэнг бүр ч тодотгосон байв. Үүн дээрээ “Bulgari” брэндийн дэлхийд цорын ганц байгаа тансаг хүзүүний зүүлт болон 107,15-каратын Индранил чулуун бөгжийг хослуулан зүүсэн байлаа.
Энн Хэтэуэйн уг гайхалтай дүр төрхүүд нь оддын нүүр будагч Флорри Уайт, стилист Эрин Уолш, үсний мэргэжилтэн Адир Абергель нарын хамтын бүтээл юм. Хэтэрхий тод биш, байгалийн гоо үзэсгэлэнг нь тодотгохыг хичээсэн будалт хийж, үс засалтын хувьд 1960-аад оны Франц жүжигчдээс сэдэл авч классик хэв маягаар засжээ.
Харин хувцаслалтын хувьд Armani Privé, Schiaparelli, Louis Vuitton, Gucci, Valentino зэрэг дэлхийн шилдэг брэндүүдийн хамгийн сүүлийн үеийн гоёмсог загваруудыг сонгож өмссөн нь олны харааг булааж байсан. Ингээд түүний Каннын наадмын загварлаг дүр төрхүүдээс хуваалцъя.
