Saint Laurent брэндийн бүтээлч захирал Энтони Ваккарелло энэ удаагийн хавар зуны коллекцио модерн бүжгийн ертөнцөд хувьсгал хийж чадсан, Америкийн алдартай бүжиг дэглээч Марта Грэмээс сэдэл авч бүтээжээ. 1930-аад онд түүний бүжигчдийн өмсөж байсан “tube” даашинзнаас санаа авсан урт шулуун, байгалийн өнгөтэй, тансаг загварын даашинзнууд шоунд нь зонхилж байлаа.
Christian Dior загварын ордны бүтээлч захирал Мария Грация Кьюри шинэ коллекци бүртээ өөрийн гайхалтай төсөөллөө бодит бүтээл болгодог уламжлалтай. Энэ удаагийн коллекцио 1500-аад онд Италийн язгууртан эмэгтэйгээс Францын хатан хаан болж чадсан “Catherine de Medici”-гээс сэдэвлэн бүтээжээ. Мария Грация Кьюри нь хэлэхдээ түүний улс төрийн үзэл бодол, ухаалаг байдал, мөн шинэлэг загварын хувцсыг язгууртны ертөнцөд нэвтрүүлж чадсан гэх мэт олон зүйлийг нь бишрэн шүтэж явдаг гэнэ.
Английн Burberry загварын ордны бүтээлч захирал Рикардо Тиши нь Burberry дахь сүүлийнхээ коллекцийг танилцууллаа. Түүний оронд загвар зохион бүтээгч Даниел Лий нь Burberry-гийн бүтээлч захирлаар томилогдож байгаа юм. Рикардо Тиши хэлэхдээ “Англид, зуны улиралд далай бол эрх чөлөө, ардчиллыг мэдрүүлдэг газар. Орон орны янз бүрийн хүмүүс далай дээр ирж, энэ энгийн зүйлээс л таашаал авдаг. Би тэдний сэтгэл хөдлөл, баяр баясал, мэдрэмжийг коллекциороо илэрхийлэхийг хүссэн” гэжээ.
Минимал стилиэрээ дэлхийд танигдсан Giorgio Armani тансаг загварын брэнд нь 2023 оны Хавар/Зуны шоугаараа өд шиг хөнгөн, гэрэл гэгээ цацруулсан гоёмсог загваруудаа хүргэлээ. Уг шоунд нимгэн гэрэлтдэг материалтай, цайвар алтлаг, мөнгөлөг болон үзмэн ягаан өнгөтэй, эмэгтэй хүний бие галбирыг тодотгох урт намирсан загварууд зонхилж байсан юм.
Энэ улирлын хамгийн сонирхолтой шоу бол яах аргагүй Gucci загварын ордны шоу байв. Учир нь брэндийн бүтээлч захирал Алессандро Микеле 2023 оны Хавар/Зуны шоундаа 68 ихрийг яг ижил загварын хувцас өмсүүлэн алхуулжээ. Тэрээр ээжээсээ болон түүний ихрээс сэдэл авч ийнхүү өвөрмөц байдлаар шоугаа хийхээр шийдсэн байна.
