Bottega Veneta брэндийг Мишель Таддеи, Ренцо Зенгиаро нар 1966 онд Италийн Виченца хотод үүсгэн байгуулжээ. Тэдний алдартай сүлжээс нь техник төхөөрөмжийн асуудлаас болж үүссэн гэвэл та итгэх үү. Тухайн үед зузаан арьсан материалыг оёж чадах машин байхгүйгээс болж нимгэн арьсыг илүү бат бөх, эдэлгээ сайтай болгохын тулд арьсаа сүлжиж хийх болсон нь өдгөө брэндийн таних тэмдэг болсон байна.
Ингээд Bottega Veneta брэндийн цаг үеийн хамгийн алдартай 7 цүнхтэй танилцъя.
The Sardine
Яг одоо тренд болж байгаа Bottega цүнх бол “Sardine” загварын цүнх юм. Сайн анзаарвал бариул нь яг л Сардин загас шиг хэлбэртэй байгаа биз. Уг цүнхний их биеийг хонины арьсаар хийдэг. Брэндийн бүтээлч захирал Матье Блази нь 2022 оны намар өвлийн загварын шоундаа зориулан Sardine-г бүтээжээ. Уг цүнх нь Кендалл Женнер, Рози Хантингтон-Вайтли зэрэг алдартнуудын дуртай загвар болж чадсан. Үнэ нь $4,200-с эхэлдэг.
The Clicker
Харин сүүлийн үед минималистуудыг дурлуулаад байгаа загвар бол “Clicker” юм. Хавтгай хэлбэртэй, тансаг загварын уг цүнхээ Bottega Veneta нь 2023 оны Резорт шоун дээрээ анх танилцуулсан. Мөн л хонины арьсаар хийгдсэн ба хоёр өөр хэмжээтэй байдаг. Жижиг нь $5,200, дундаж хэмжээтэй нь $5,500 үнэтэй худалдаалагддаг.
The Kalimero
2021 онд Bottega Veneta-гийн бүтээлч захирлаар томилогдсоноосоо хойш Матье Блази нь шинэлэг загваруудыг гаргасаар байгаа. Үүний нэг нь яах аргагүй “The Kalimero” цүнх юм. Уг цүнхийг 2022 оны намар өвлийн загварын шоун дээр танилцуулсан ба энгийн майк, сул жийнс, түрийтэй гутал гээд маш чөлөөт загварын хувцастай хослуулсан нь Bottega брэндийн хувьд маш шинэлэг байж чадсан. Уг цүнх нь хэд хэдэн төрлийн загвар, хэмжээ, материалтай гардаг ба үнэ нь $7500-с эхэлдэг.
The Jodie
Анх Jodie цүнх нь ямар ч нэршилгүй байжээ. Харин жүжигчин Жоди Фостер нүүрээ Bottega-гийн том цүнхээрээ халхалж папарациудын дуранд өртсөнөөс хойш уг цүнхийг Jodie хэмээн нэрлэх болсон байна. 2020 оны Резорт коллекциороо анх танилцуулж байсан. Хобо стилийн уг цүнх нь том жижиг олон янзын өнгө хэмжээтэй гардаг ба зөвхөн Италид үйлдвэрлэгддэг. Хэмжээнээсээ хамаарч $2,600-$6,700 үнэтэй байдаг.
The Cassette
Касет цүнхийг мэдэхгүй хүн ховор байх. Bottega Veneta нь 2019 оны өвлийн коллекциороо уг цүнхийг танилцуулсан ба тэдний шинэ загваруудаас хамгийн алдартай нь болж чадсан. Тэгш өнцөгт хэлбэртэй уг загварлаг цүнх нь Интаграмын моделиудаас эхлээд загвар сонирхдог хэн бүхний хүслийн жагсаалтад орж байсан. Анх хөвсгөр “Padded” загвар нь тренд болж байсан бол сүүлийн үед хавтгай төрөл нь түгээмэл харагдах болсон. Жижиг нь $2,500, том нь $3,800 үнэтэй худалдаагддаг.
The Pouch
2018-2021 оны хооронд Bottega Veneta брэндийн бүтээлч захирлаар ажиллаж байсан Дэниел Ли нь “The Pouch” загварыг бүтээсэн. Уг минимал загварын цүнхийг 2020 оны хавар зуны коллекциороо танилцуулсан ба маш зөөлөн үхрийн арьсаар хийгдсэнээрээ онцлогтой. Урт, богино, гинжин оосортой гээд л олон төрлүүд байдаг ба $2500-$4200 хооронд худалдаалагддаг байна.
The Cabat
Кабат цүнх нь олон жилийн түүхтэй. 2001-2018 оны хооронд Bottega Veneta-гийн бүтээлч захирал байсан Томас Майер уг цүнхийг 2001 онд анх бүтээж байжээ. Ямар ч цахилгаан, доторлогоо, халаас, ил оёдол байхгүй, зөвхөн арьсыг сүлжиж хийснээрээ онцлогтой. Энэ нь 2001 оноос хойш үе үеийн загвар сонирхогчдын хайртай загвар болсоор ирсэн билээ. Хэмжээнээсээ хамаарч $5000–$9900 үнэтэй байдаг.
