2023 оны Намар-Өвлийн загварын шоунууд энэ оны эхээр амжилттай болж өнгөрсөн билээ. Тэгвэл та бүхэнд дэлхийн загварын нийслэлүүд болох Милан, Парис, Нью-Йорк, Лондоны загварын тайзыг чимсэн 7 аксессуарын трендийг танилцуулъя.
Энгэрийн зүүлт
Энгэрийн гоёл зүүх нь энэ жилийн бүсгүйчүүдийн загварын чиг хандлагыг тодорхойлж байна. Louis Vuitton, Saint Laurent, Coperni зэрэг тансаг зэрэглэлийн брэндүүдийн 2023 оны шоунуудаас өвөрмөц хэлбэртэй энгэрийн зүүлт болон гоёмсог ороолтын хослолыг харж болно.
Максималист загварууд
Яг одоо максимализмын эрин үе гэдгийг Милан болон Парисын загварын 7 хоног баталлаа. Том хэмжээтэй, сонирхолтой хэлбэр бүхий хүзүүний зүүлтүүд болон ээмэгнүүд Etro, Moschino, Balmain брэндүүдийн тайзыг эзэгнэлээ.
Гинжин зүүлт
Сүүлийн жилүүдэд бүсгүйчүүдийн дурлах болсон аксессуаруудын нэг бол яах аргагүй хүзүүний гинж билээ. 2023 онд уг загвар нь илүү том хэмжээтэй, богино загвартай болж шинэчлэгдсэн байна. Chanel, Schiaparelli, Givenchy зэрэг томоохон брэндүүдийн загварын шоун дээр гинжтэй чокерууд зонхилж байв.
Өргөн бугуйвч
Парисын загварын 7 хоногийн онцлох нэгэн гоёл бол энгийн хэрнээ тансаг загвартай өргөн бугуйвч байлаа. Хэрвээ та олон төрлийн аксессуар зүүх дургүй бол өргөн загвартай бугуйвчийг сонгон минималист хувцаслалттай хослуулаад үзээрэй.
Бохо стиль
Бохемиан стилийн шүрэн зүүлтүүд 2023 оны өвлийн чиг хандлагыг тодорхойллоо. Ялангуяа Roberto Cavalli болон Etro брэндүүд шинэ коллекцидоо уг өнгөлөг загваруудыг онцолсон байв. Зөвхөн бүсгүйчүүд гэлтгүй залууст ч мөн хамааралтай тренд шүү.
Чармтай загварууд
Пандорагийн бугуйвчиндаа чарм цуглуулах дуртай юу? Тэгвэл яг л танд тохирсон унжлагатай аксессуарууд энэ жилийн тренд болоод байна. Олон төрлийн чармтай хүзүүний зүүлт болон бугуйвчнууд нь Burberry , Chopova Lowena брэндүүдийн загварын шоунд зонхилж байлаа.
Орчин үеийн сувд
Сувд бол үеэс үед уламжлагдан ирдэг, хэзээ ч моданаас гарахгүй жинхэнэ сонгодог гоёл билээ. Тэгвэл орчин үеийн загвартай төрөл бүрийн сувдан зүүлт чимэглэлүүд нь 2023 оны Лондоны загварын 7 хоногийн хамгийн онцлох загвар байлаа. Мөн Панкийн хатан хаан Vivienne Westwood-ийн 1980-аад онд анх гаргаж байсан винтеж сувдан чокер “Gen Z” үеийнхний хамгийн хүсэмжит загвар болоод байна.
