Бэлтгэлийн өмд трендээс гарч, эрэгтэй тасгаас сонгож авсан мэт хэлхгэр загвартай, өргөн даавуун өмд энэ хавар зуны чиг хандлага болоод байна. Хэрвээ сүүлийн үед байнга бэлтгэлийн өмд эсвэл жийнс өмссөөр уйдсан бол ийм өргөн загварын даавуун өмднөөс сонирхоод үзээрэй. Биед маш эвтэйхэн хирнээ тун загварлаг сонголт байх болно.
The Row брендийн 2021 оны хавар зуны цуглуулгад энэ загвар зонхилж байсан. Уг коллекцид өргөн өмдийг цагаан сорочкин цамц, бариу кардиган, сул пиджак, жилет зэрэг энгийн өдөр тутмын загваруудтай хослуулан, ажил хэрэгч, минимал, загварлаг, эрэгтэйлэг, элегант гээд олон төрлийн дүр төрхийг бүрдүүлж харуулжээ.
Зуны улиралд шагайны дээгүүр татсан, богино загвартай өргөн өмдийг сонгож, минимал өсгийтэй сандаал эсвэл арьсан потинктой хослуулж болох юм. Харин арай сэрүүний улиралд аль болох урт загварын өмдийг өсгийтэй гуталтай хослуулж, хэт хичээгээгүй хирнээ дэгжин “Chic” дүр төрхийг бүрдүүлээрэй.
