Байкер стиль гэхээр шууд л савхин хүрэм, урт түрийтэй гутал санаанд ордог биз дээ. Тэгвэл яг үнэндээ байкер стиль нь зүгээр л нэг эршүүд , COOL харагдахаас илүү хувцасны деталь болгон нь тодорхой зориулалт, утга учрыг агуулдаг.
БАЙКЕР ЗАГВАРЫН ЭХЛЭЛ
Өнөөдөр сонирхсон хэн бүхэн л мотоцикл унаж болно. Харин 100 гаруй жилийн өмнө анх гарч ирэхдээ зөвхөн баячууд л худалдан авч чадах тансаг хэрэглээ байжээ. Тэд мотоциклыг унааны зориулалтаар бус гэрийнхээ ойр орчмын цэцэрлэгт хүрээлэн эсвэл нуур цөөрмийн ойролцоо унаж зугаацдаг байв. Хувцаслалтын хувьд твид хүрэм, кепкан малгай зэрэг цэмцгэр загвараар гоёдог байсан бөгөөд доогуураа түрийтэй гутал өмсч хөлөө хамгаалдаг байжээ.
Анхны загвараас хойш мотоциклын хурд хүч харьцангуй нэмэгдсэн учир байкерууд биеэ гэмтээхгүйн тулд хамгаалалтын хувцас өмсөх шаардлагатай болов. Түрийтэй гутлаас гадна салхи зүсэн давхих үед гарыг дулаан байлгах хамгаалалтын бээлий гарсан ба дараагаар нь 1920-оод оны үед мотоциклын уралдаанд зориулсан тусгай шил ашиглаж эхэлсэн нь байкер стилийг бусдаас өөр, илүү содон болгож өгчээ. Үүнээс гадна тод өнгөтэй, бариу загвартай, дээрээ мотоциклын клубын эсвэл брэндийн логотой ноосон цамцнууд нь мотоциклын уралдааны сонгодог нэгэн хувцас юм.
САВХИН ХҮРЭМ
Тухайн үед байкеруудын хувцас бороо, цас, салхинаас хангалттай хамгаалж чаддаггүй байсан учир байкерчид шинэ төрлийн хувцас хайж эхэлжээ. Эцэст нь цэргийн хувцаснаас, тэр тусмаа нисгэгчдийн хувцаснаас санаа авч урт савхин хүрэм өмсөх болов. Харин хүрмийн урт нь мотоцикл унахад тохиромжгүй байсан тул одоогийн бидний сайн мэдэх богино загварын “Perfecto” савхин хүрмийг Ирвин Шотт 1928 онд мотоциклчдод тусгайлан зориулж бүтээж байсан. Тэрээр өөрийн гэсэн жижиг оёдлын үйлдвэртэй, мотоциклд нугасгүй нэгэн байжээ.
1940 он гэхэд Шоттын компани аль хэдийн Америкт алдартай болж савхин хүрмийг зөвхөн мотоциклчид ч биш батлан хамгаалахын яамныхан болон армийн нисгэгчид өмсөж эхэлсэн байна. Салхинаас хамгаалахын тулд нисгэгчдийн савхины бэлхүүс хэсгийг нарийсгаж, ханцуйг нь уртасгаж, зузаан үхрийн арьсаар хийх болжээ. Мөн хамгийн чухал ялгарах онцлог нь хүрмийн доод хэсэг дэх бүс, болон цахилгаантай халаас, салхинаас хамгаалах зориулалттай зүүн мөрнөөс баруун ташаа хүртэл үргэлжилсэн урт цахилгаан нь байв. Хамгийн сонирхолтой нь энэ бүх деталиуд нь тэр чигтээ өнөөдрийг хүртэл өөрчлөгдөөгүй үлдсэн билээ.
Хантааз
Савхин хүрмийг олон зориулалтаар өмсөж болох ч халуун үед тийм ч тохиромжтой хувцас биш юм. Ялангуяа мотоциклын клубууд ихэнхдээ 40 градусаас дээш халдаг Америкын өмнөд нутгаас гаралтай байдаг. Тиймээс ч тэд савхин хүрмийн оронд савхин эсвэл жийнсэн материалтай хантааз өмсөж эхэлжээ. Хамгийн гол нь ардаа клубынхаа нэр байршил логог ардаа хадсан байх ёстой гэнэ
ГУТАЛ
Байкерууд ерөнхийдөө инженер гутал нэрээр танигдсан арьсан түрийтэй гутлыг өмссөөр ирсэн. Уг гутал нь анх Америкт төмөр зам дээр ажиллаж байсан инженерүүдэд зориулагдан хийгдэж байсан учир Инженер гутал хэмээн нэрлэгдсэн байна.
ХАМГААЛАЛТЫН ДУУЛГА
Мотоциклчид өөрсдийгөө босогчид, эсэргүүцэгчид гэж үздэг учир анх хамгаалалтын дуулга огт хэрэглэдэггүй байжээ. Харин 1935 онд Арабын Лоуренс мотоциклын осолд орж нас барснаас хойш хамгаалалтын дуулга өмсдөг болсон байна.
ГОЁЛ ЧИМЭГЛЭЛ
Нэгэн сонирхолтой түүхээс дурдахад түрийвчний гинжин оосрыг байкерууд анхлан моданд оруулж байжээ. Тэд хамгийн үнэ цэнэтэй зүйлээ замдаа унагааж алдахгүйн тулд эд зүйлсээ гинжээр өмдтэйгөө холбодог байв. Үүнээс гадна байкеруудын бугуйвч нь мөн л загвар гэхээсээ илүү хамгаалах зориулалттай аксессуар юм. Тэдний өргөн арьсан бугуйвч нь мотоцикл унах үед бугуйгаа чилээхгүй байх, мөн хэрвээ мотоциклоосоо унавал гараа зүсэх, бэртээх зэргээс хамгаалдаг байна.
Түүнчлэн байкеруудын хамгийн түгээмэл нэгэн аксессуар нь том бөгж юм. Тэдний дунд түргэн ууртай, цөс ихтэй эрчүүд цөөнгүй гэдэг нь нууц биш юм. Тиймээс ч нударга зөрүүлэх тохиолдол цөөнгүй гардаг. Ингэхдээ том бөгжөө зэвсэг болгон ашигладаг тул үүний эсрэг хууль хүртэл баталсан олон муж бий.
